უმრავლესობის წევრმა, ალუდა ღუდუშაურმა, „პალიტრანიუსის“ გადაცემა „ნიუსრუმში“ თამარ ჟვანიას მიერ ცესკო-ს თავმჯდომარის თანამდებობის დატოვებაზე ისაუბრა.
მისი თქმით, თამარ ჟვანია თავისი საქმის პროფესიონალი იყო და მას უფრო მეტი ვაჟკაცობა, გამბედაობა, სახელმწიფოებრივი ხედვა და პასუხისმგებლობა აღმოაჩნდა, ვიდრე მთელ ოპოზიციას.
„თამარ ჟვანია არსად გაქცეულა და არავის გადაუყენებია. ქალბატონი ჟვანია იყო არჩეული თანამდებობის პირი. მას უფრო მეტი ვაჟკაცობა, გამბედაობა, სახელმწიფოებრივი ხედვა და პასუხისმგებლობა აღმოაჩნდა, ვიდრე მთელ ოპოზიციურ კონგლომერატს, რომლებიც ყიყინებენ, რაღაც აჟიოტაჟში არიან და დესტრუქციას აწყობენ.
ოპოზიციას მივმართავ, „ნაციონალურ მოძრაობასა“ და ძირითადად მის სატელიტებს ვგულისხმობ - საარჩევნო კანონმდებლობასთან დაკავშირებით არ გინდა მსჯელობა, სასამართლო მიმართულებაში არ გინდა, საარჩევნო კომისიის თავმჯდომარესთან მიმართებაში არ გინდა, საგნობრივი დისკუსია და საქმიანი მსჯელობა არ გინდა, მაგრამ გინდა საცირკო წარმოდგენა. დიახ, ბატონი გიორგი ვაშაძე პირველობას არავის ანებებს ამ საცირკო შოუების წარმოდგენაში და ახლა, როგორც ჩანს, სხვა ოპოზიციონერებმაც იფიქრეს, რომ რითი უნდა დაკავებულიყვნენ. საქმის კეთებაზე ორიენტირებული ეს ხალხი არ არის და ამიტომ ახლა, კონკურენციაში შედიან გიორგი ვაშაძესთან. ეს არის ძალიან სამწუხარო“ - ამბობს ალუდა ღუდუშაური.
მთავარი ფოტო: agora.ge
