ინციდენტი მოხდა რიონის ხეობაში. ნამახვანჰესის მშენებლობის მოწინააღმდეგეთა აქციის აქტივისტები პოლიციამ ძალის გამოყენებით გადასწია გზის სავალი ნაწილიდან. შემთხვევა დღეს, 29 მაისს დილის საათებში მოხდა.
ინციდენტის ამსახველ კადრებს სოციალურ ქსელში აქტივისტი, ლაშა მესხი ავრცელებს. შემთხვევა ნამახვანჰესის მშენებარე კომპანიის "ენკას" ტექნიკურ ბაზაზე მოხდა. შსს-ის თანამშრომლებმა დემონსტრანტები ტერიტორიიდან იმ მიზეზით გასწიეს, რომ კომპანიის ტექნიკას, მსუბუქ ავტომობილებსა და ავტობუსს გადაადგილება მოეხერხებინათ.
აქციის მონაწილეები კვლავაც რჩებიან გუმათში, მათ სოფელ ნამახვანისკენ გადაადგილების საშუალება შეზღუდული აქვთ სპეციალურად აღმართული რკინის ბარიკადების მეშვეობით, ისინი აღნიშნულ ჯებირზე ბრახუნით აპროტესტებენ ნამახვანჰესის მშენებლობას.
ფოტო: facebook
