პარტია მოქალაქეების თავმჯდომარე, ალეკო ელისაშვილი ქარელის მუნიციპალიტეტში, რუსი ოკუპანტების მიერ ე.წ. ბორდერიზაციის განახლებას ეხმაურება და აცხადებს, რომ ნორმალურ ქვეყანაში პოლიტიკური პროცესების ძირითადი თემა, სწორედ ეს მცოცავი ოკუპაცია იქნებოდა და არა ის, თუ ვის რომელი  მუხლი მოსწონს ამნისტიის კანონში. მისი თქმით, რუსი ოკუპანტები, კარგად იყენებს ჩვენს შიდა დაპირისპირებას თავისი იმპერიალისტური მიზნებისთვის.

- თუ დააკვირდებით, საზღვრის გადმოწევა, ხნულების გავლება და ათასი საზიზღრობა, სწორედ მაშინ ხდება, როცა ჩვენთან შიდა დაპირისპირებები პიკს აღწევს. ნორმალურ ქვეყანაში, ახლა ხელისუფლებაც და ოპოზიციაც ამ თემის ირგვლივ უნდა ვიყოთ გაერთიანებულები და ვეძებდეთ გზებს, ე.წ ბორდერიზაციის შესაჩერებლად. სამწუხაროდ, ხდება ისე, რომ ამ საკითხისთვის ჩვენს პოლიტიკურ ისტემბლიშმენტს არ სცალია და უფრო ,,მნიშვნელოვან" საკითხზე მუშაობენ, მაგალითად ამნისტიის კანონში რომელი მუხლია მისაღები ხელისუფლებისთვის და რომელი ოპოზიციისთვის. - აცხადებს პარტია მოქალაქეების ერტ-ერთი ლიდერი, ალეკო ელისაშვილი.

შეგახსენებთ, რომ ორი დღის წინ, საოკუპაციო ზოლის გასწვრივ, ქარელის მუნიციპალიტეტის სოფლების ცერონისისა და კნოლევის პერიმეტრზე, ე.წ. სასაზღვრო მწვანე ბანერების გასწვრივ, სასოფლო სამეურნეო ტექნიკით ხნული გაავლეს.

ფოტო: facebook