ეროვნული თანხმობა პრეზიდენტის ინიციატივა არ არის, სამწუხაროდ პრეზიდენტმა დააგვიანა ამ თემაზე საუბარი. ამის შესახებ ,,ლელოს“ წევრმა დავით უსუფაშვილმა განაცხადა. როგორც მან აღნიშნა, მისი გუნდი ამაზე მუდმივად საუბრობდნენ.
,,ეს პრეზიდენტის ინიციატივა არ არის, სამწუხაროდ პრეზიდენტმა დააგვიანა ამ თემაზე საუბარი. ამაზე მეც და „ლელოც“ მუდმივად ვსაუბრობთ, რადგან ქვეყანა მაშინ შედგება, როდესაც ჩვენ ერთად თანაცხოვრებას შევძლებთ. უკიდურეს პოზიციებს, რომ იკავებენ ხოლმე, თითქოს ეს საქმეს სჭირდება, შემდეგ ის უშლის ხელს ეროვნულ თანხმობას. გასული საპრეზიდენტო არჩევნების საარჩევნო კამპანია ეს იყო ყველაზე უფრო დამაზიანებელი ერთი კონკრეტული მოვლენა თანხმობის მიღწევისთვის. ამიტომ კარგია, თუ ახლა პრეზიდენტი უერთდება ამ ამოცანას“ _ განაცხადა დავით უსუფაშვილმა.
საქართველოს პრეზიდენტმა სალომე ზურაბიშვილმა გუშინ განაცხადა:„ეროვნული თანხმობა არის და მუდმივად იქნება ჩემი ძალისხმევა, ეს ჩემი ახირება არ არის, საზოგადოების დაკვეთაა“. მისი თქმით, ყველას გვტკივა ის ძალიან მძიმე ფონი, რომელიც შექმნილია პოლიტიკურ სპექტრში და საზოგადოებაში: გაუთავებელი დაპირისპირება და პოლარიზაცია. როგორც პრეზიდენტმა აღნიშნა, საზოგადოებას დღეს სჭირდება სიმშვიდე და ერთობა, რაც ქვეყანას გააძლიერებს.
