ოლექსეი არესტოვიჩი აცხადებს, რომ ის საპრეზიდენტო არჩევნებზე თავის კანდიდატურას წარადგენს იმ შემთხვევაში, თუ ვოლოდიმირ ზელენსკი კენჭს არ იყრის. მისივე თქმით, თუ ზელენსკი არჩევნებში მონაწილეობას მიიღებს, მაშინ მას ,,ხელს არ შეუშლის“. ამის შესახებ მან დიმიტრი გორდონთან ინტერვიუში ისაუბრა.
არესტოვიჩის თქმით, მისი რეიტინგი პრეზიდენტის ახლანდელი რეიტინგია.
„ჩემი რეიტინგი პრეზიდენტის ახლანდელი რეიტინგია. მე არ ვემიჯნები პრეზიდენტს. არასდროს ვუცრუებ იმედს იმ ადამიანებს, ვისთანაც ვმუშაობ. შეიძლება განსხვავებული აზრი მქონდეს, მაგრამ ამას გარეთ არასდროს გამოვიტან...
თუ ის (ზელენსკი) მეორე ვადით იყრის კენჭს, ბუნებრივია, მე მას ხელს არ შევუშლი, არავითარ შემთხვევაში, ტექნიკურად შეუძლებელია“ _ თქვა არესტოვიჩმა.
მან დაადასტურა, რომ წინააღმდეგ შემთხვევაში თვითონ იყრის კენჭს არჩევნებზე. მისი თქმით, მას პრეზიდენტობა სჭირდება იმისთვის, რომ დაეხმაროს ხალხს და „რამე კარგი გააკეთოს“.
,,ძალიან მინდა გამოვიყენო ეს, როგორც შესაძლებლობა ბევრი რამის გასაკეთებლად ქვეყნისთვის და ხალხისთვის" _ თქვა მან.
