ევროკავშირის ენერგეტიკის მინისტრები მოლაპარაკებების შედეგად შეთანხმდნენ, რომ ქვეყნები შეამცირებენ გაზის მოხმარებას იმ რისკის გათვალისწინებით, თუ რუსეთი მიწოდებას შეაჩერებს. გეგმის თანახმად, აგვისტოდან მარტამდე ქვეყნები გაზის მოხმარებას ნებაყოფლობით 15%-ით შეამცირებენ.

„გაზის მოხმარების შემცირების მიზანია, მოხდეს დაზოგვა, რათა ქვეყნები მზად იყვნენ რუსეთიდან გაზის მიწოდების შესაძლო შეფერხებისთვის. რუსეთი მუდმივად იყენებს ენერგომომარაგებას, როგორც იარაღს“ _ აცხადებენ ევროკავშირში.

შეთანხმებაში ნათქვამია, რომ გაზის მოთხოვნის შემცირება სავალდებულო გახდება, თუ მიწოდება კრიზისის დონეს მიაღწევს.

თუმცა, ზოგიერთი ქვეყანა, რომელიც არ არის დაკავშირებული სხვა წევრი ქვეყნების გაზსადენებთან, ასევე, ის ქვეყნები, რომლებიც არ არიან დაკავშირებული ევროპულ ელექტროსისტემასთან და ელექტროენერგიის საწარმოებლად დამოკიდებული არიან გაზზე,  გათავისუფლებული იქნებიან გაზის შემცირების ვალდებულებისგან.

ევროკავშირის წევრი ქვეყნების შეთანხმება ,,გაზპრომის“ განცხადებას უკავშირდება, რომლის თანახმადაც, კომპანია ევროპისთვის გაზის მიწოდებას ამცირებს და მიზეზად ასახელებს ერთ-ერთი ტურბინის ტექნიკურ მდგომარეობას, რომელიც კაპიტალურ შეკეთებას საჭიროებს. უკვე კვირებია, რაც მილსადენში, რომელიც გაზს რუსეთიდან გერმანიაში ატარებს, გაზის ნაკადი საკმაოდ დაბალია და უკრაინა მოსკოვს ევროპის წინააღმდეგ ,,გაზის ომის" წარმოებაში ადანაშაულებს.

„გაზპრომმა“ მთლიანად შეუწყვიტა გაზის მიწოდება ბულგარეთს, დანიას, ფინეთს, ნიდერლანდებსა და პოლონეთს იმის გამო, რომ მათ უარი თქვეს კრემლის ბრძანების შესრულებაზე, გადაეხადათ გადასახადები რუბლებში, და არა ევროსა და დოლარში.

გასულ წელს რუსეთი თავისი გაზის 40%-ს ევროკავშირს აწვდიდა და უკრაინაში შეჭრის შემდეგ ევროპელი ლიდერები აწარმოებდნენ მოლაპარაკებებს, რომ რუსულ საწვავზე დამოკიდებულება შეემცირებინათ.