„გაზპრომი“ „ჩრდილოეთის ნაკადის“ კიდევ ერთი ტურბინის მუშაობას შეაჩერებს. როგორც რუსული პროპაგანდისტული მედია იტყობნება, ,,გაზპრომი“ იძულებულია შეაჩეროს კიდევ ერთი გაზის ტურბინის მუშაობა, რადგან გაზის ტურბინის ძრავა მოითხოვს დაგეგმილ კაპიტალურ შეკეთებას. ამის შედეგად, გაზის მიწოდება მიმდინარე მოცულობებთან შედარებით განახევრდება.

,,კაპიტალური რემონტის დაწყებამდე შეკეთებებს შორის დროის დასრულებასთან დაკავშირებით (როსტეხნაძორის ინსტრუქციის შესაბამისად და ძრავის ტექნიკური მდგომარეობის გათვალისწინებით), გაზპრომი კიდევ ერთი Siemens-ის გაზის ტურბინის ძრავის მუშაობას აჩერებს“ _ წერია კორპორაციის ინფორმაციაში.

ამრიგად, ყოველდღიური მიწოდება 27 ივლისიდან თითქმის განახევრდება - არსებული 67 მლნ კუბური მეტრიდან 33 მილიონ კუბურ მეტრამდე შემცირდება.

რუსეთის პრეზიდენტმა ვლადიმერ პუტინმა ამის თაობაზე გაფრთხილება ჯერ კიდევ გასულ კვირას გააკეთა. მან ყურადღება გაამახვილა იმ ფაქტზე, რომ ივლისის ბოლოს სარემონტო სამუშაოებზე კიდევ ერთი ტურბინა გაიგზავნება.

რუსეთის ექსპორტი ევროკავშირის მიერ მოხმარებული ბუნებრივი აირის დაახლოებით 40%-ს შეადგენდა.