,,როსტურიზმი“ იწყებს ახალ ეროვნულ ტურისტულ მარშრუტს ვლადიმერ პუტინის დასვენების ადგილებში. ამის შესახებ ტურისტული დეპარტამენტის ხელმძღვანელმა ზარინა დოგუზოვამ პეტერბურგის საერთაშორისო ეკონომიკურ ფორუმზე განაცხადა.

ტურისტებს სთავაზობენ დასვენებას იმ ადგილებში სადაც პუტინი წლების განმავლობაში ისვენებდა და ტურს ,,ციმბირის არდადეგები" ეწოდება. ,,როსტურიზმმა“ პუტინის დასვენების ადგილებში ტურისტული მარშრუტების დაგეგმვა ჯერ კიდევ 2021 წლის ოქტომბერში დაიწყო. როგორც ტურისტულ დეპარტამენტში განაცხადეს, ამ ადგილებზე ტურისტებისგან დიდი მოთხოვნა იყო.

,,ეს არის აბსოლუტურად განსაკუთრებული მარშრუტი, რომელსაც ნამდვილად არ აქვს ანალოგი. გადის კრასნოიარსკის ტერიტორიის, ხაკასიასა და ტუვას ტერიტორიებზე და ეწოდება ,,ციმბირის არდადეგები“. იგი აერთიანებს წარმოუდგენლად ლამაზ ბუნებას, ციმბირის ხალხების ძალიან ნათელ ეთნიკურობას, უნიკალურ არტეფაქტებს - სკვითების ოქრო, შუა იენისეის პრეისტორიული სამეფოების ლიდერების გრანდიოზული სამარხები, ბუდიზმის რელიგიური ადგილები ტუვაში და მრავალი სხვა“ _ თქვა დოგუზოვამ. 

მისივე თქმით, ტურისტთა პირველი ჯგუფები მარშრუტზე ივლისში გაემგზავრებიან.