ევროკომისიის გადაწყვეტილება ცნობილია - ურსულა ფონ დერ ლაიენის განცხადებით, ევროკომისია საქართველოსთვის ევროპულ პერსპექტივაზე რეკომენდაციას აძლევს, თუმცა სტატუსის მინიჭებას ამ ეტაპზე მხარს არ უჭერს.
,,საქართველო იზიარებს იგივე პოტენციალსა და მისწრაფებებს, რასაც უკრაინა და მოლდოვა.საქართველოს უპირატესობა არის საბაზრო ორიენტაცია და ძლიერი კერძო სექტორი. წარმატებისთვის ახლა ქვეყანა უნდა გაერთიანდეს პოლიტიკურად, რათა შეიქმნას ნათელი გზა სტრუქტურული რეფორმისკენ და ევროკავშირისკენ. ეს უნდა იყოს გეგმა, რომელიც სამოქალაქო საზოგადოებისა და ფართო პოლიტიკური მხარდაჭერით კონკრეტულად აღწერს აუცილებელ რეფორმებს. ამიტომ, ჩვენ მივმართავთ საბჭოს, რომ საქართველოს მიანიჭოს ევროპული პერსპექტივა და შემდეგ შეაფასოს, როგორ აკმაყოფილებს ეს ქვეყანა პირობებს, სანამ მიანიჭებს კანდიდატის სტატუსს“ _ განაცხადა ურსულა ფონ დერ ლაიენმა.
რაც შეეხება მოლდოვასა და უკრაინას, ევროკომისიამ კანდიდატის სტატუსის მინიჭების რეკომენდაცია გასცა.
,,კომისია რეკომენდაციას იძლევა საბჭოსადმი, მიეცეს უკრაინას ევროპერსპექტივა და ამავდროულად კანდიდატის სტატუსიც. ეს მოხდება იმის საფუძველზე, რომ ქვეყანაში შემდგომი მნიშვნელოვანი რეფორმები განხორციელდება.
მოლდოვას დიდწილად ეხება იგივე, რაც უკრაინას. ჩვენ რეკომენდაციას ვუწევთ, რომ მიიღოს ევროპული პერსპექტივა და კანდიდატის სტატუსი იმ პირობით, რომ ქვეყანა კვლავაც განახორციელებს მნიშვნელოვან რეფორმებს“ _ განაცხადა ურსულა ფონ დერ ლაიენმა.
