მსოფლიოში ეთიკური, გარემოს დაცვის თუ ჯანმრთელობასთან დაკავშირებული საკითხების გამო კვებითი ჩვევების შეცვლის მიმართ მზარდი ინტერესია. ამ მიზეზებით, სულ უფრო მეტი ადამიანი ამბობს უარს ცხოველური წარმოშობის პროდუქტებზე და მათ ან სრულად, ან ნაწილობრივ იღებენ საკუთარი კვების რაციონიდან.

იმისთვის, რომ უკეთ დავინახოთ, თუ რა სურათია ამა თუ იმ ქვეყანაში საკვების მოთხოვნასთან დაკავშირებით, საკმარისია თვალი შევავლოთ სუპერმარკეტებში დახლებზე განთავსებულ პროდუქციას. საქართველოს მაგალითით თუ ვიმსჯელებთ, ცხოველურ და მცენარეულ პროდუქტებზე მოთხოვნა თითქმის თანაბარია, თუმცა ბოლო პერიოდში ცხოველური პროდუქტების მცენარეული ალტერნატივებით ჩანაცვლების ტენდენციაც შეინიშნება. საინტერესოა, რა ვითარებაა ამ მხრივ მსოფლიოში.

ourworldindata-ს მიერ გამოქვეყნებული ახალი სტატისტიკური მონაცემების მიხედვით, ბრიტანეთის მოსახლეობის 10% ხორცს არ ჭამს.

კვლევის ფარგლებში გამოკითხეს 2000 ზრდასრული ბრიტანელი, რომელთაც 6 ვარიანტიდან მხოლოდ ის ერთი უნდა აერჩიათ, რომელიც მათ კვების რაციონს ყველაზე უკეთ აღწერდა. შეთავაზებული ვარიანტები იყო: ხორცის მჭამელი, ფლექსიტარიანელი (ძირითადად მცენარეებით იკვებებიან და ცხოველური პროდუქტი მნიშვნელოვნად აქვთ შემცირებული), პესკეტარიანელი (არ მიირთმევენ ცხოველისა და ფრინველის ხორცს, თუმცა მიირთმევენ თევზსა და სხვა ცხოველურ პროდუქტებს), ვეგეტარიანელი (უარს ამბობენ ყველანაირ ხორცზე, მათ შორის, თევზზეც, თუმცა მათ რაციონში არის ცხოველური წარმოშობის სხვა პროდუქტები: კვერცხი, რძის ნაწარმი და სხვ.), ვეგანი (უარს ამბობენ ნებისმიერი წარმოშობის ცხოველურ პროდუქტზე, იკვებებიან მხოლოდ მცენარეებით; ასევე უარს ამბობენ ცხოველური შემადგენლობის ნებისმიერ საყოფაცხოვრებო პროდუქციაზე) ან არცერთი მათგანი.

გამოკითხვის შედეგად აღმოჩნდა, რომ 5% საკუთარ თავს აღწერს, როგორც ვეგეტარიანელი, 3% - პესკეტარიანელი, ხოლო 2% - ვეგანი. რაც იმას ნიშნავს, რომ მოსახლეობის 10% ხორცს არ ჭამს (თუმცა, ზოგიერთი მათგანი ჭამს თევზს).

მოსახლეობის 16% აღმოჩნდა ფლექსიტარიანელი, რომელთაც იშვიათად აქვთ რაციონში ხორცი და სხვა ცხოველური პროდუქტი.

აღსანიშნავია, რომ ბრიტანეთში ჩატარებული ეს კვლევა სხვა ქვეყნებში ჩატარებულ ანალოგიურ კვლევებთან პროცენტულად ძალიან ახლოსაა.

აშშ-ში 2018 წელს ჩატარებულმა კვლევამ აჩვენა, რომ ამერიკელი მოსახლეობის 5% ვეგეტარიანელია, ხოლო 2% - ვეგანი.

Ipsos-ის მიერ 2018 წელს ჩატარებულმა უფრო ფართო კვლევამ, რომელიც 28 ქვეყანას მოიცავდა, აჩვენა, რომ მოსახლეობის 5% საკუთარ თავს თვლის ვეგეტარიანელად, 3% - ვეგანად, ხოლო მოსახლეობის 3% - არის პესკეტარიანელი. აღსანიშნავია, რომ ამ გამოკითხვის დროს ქვეყნების მიხედვით მონაცემები განსხვავდებოდა. მაგალითად, ინდოეთში ყოველი მეხუთე ვეგეტარიანელია. ისინი არ ჭამენ ხორცს რელიგიური ან ფილოსოფიური მიზეზით.