სახალხო დამცველი ნინო ლომჯარია მიხეილ სააკაშვილისთვის არაადამიანური მოპყრობის გამო დაზარალებულის სტატუსის მინიჭების მოთხოვნას სამართლიანად მიიჩნევს და აცხადებს, რომ კონკრეტული პოზიციის დაფიქსირებამდე სახალხო დამცველს მეტი ინფორმაცია და მასალების შესწავლა სჭირდება.
,,ჩვენ კარგად გვესმის დაზარალებულის სტატუსის მოთხოვნა და ვფიქრობთ, სამართლიანია, მაგრამ იმისათვის, რომ კონკრეტული პოზიცია გვქონდეს, საჭიროა საქმის მასალების ნახვა და შესწავლა. იმისთვის, რომ გავცეთ რეკომენდაცია ბრალის წარდგენის თუ დაზარალებულის მინიჭების თაობაზე, უნდა გვქონდეს გამოძიებაში არსებული მასალების და მტკიცებულებების სრული სურათი. ვთვლი, რომ აღნიშნული მოთხოვნა არის არგუმენტირებული, თუმცა, იმისათვის, რომ ეს რეკომენდაცია სახალხო დამცველმაც გასცეს, გვჭირდება მეტი ინფორმაცია, ვეცდებით ეს ინფორმაცია მოვიპოვოთ სახელმწიფო ინსპექტორის სამსახურიდან და თუ გვექნება გარკვეულ მტკიცებულებებზე წვდომა, რაც მოგვცემს იმის მტკიცების საფუძველს, რომ დაზარალებულის სტატუსის მინიჭების საფუძველი არსებობს, ჩვენ ამას ვიტყვით“ _ განაცხადა ნინო ლომჯარიამ.
