,,ქართული ოცნების“ თავმჯდომარე ირაკლი კობახიძე სახალხო დამცველის განცხადებას ეხმაურება და მას გაუგონარსა და წარმოუდგენელს უწოდებს.
კობახიძის თქმით, სახალხო დამცველი პირდაპირ ქსენოფობიურ კამპანიაში ერთვება.
,,ეს არის გაუგონარი განცხადება, როდესაც სახალხო დამცველად წოდებული ადამიანი პირდაპირ ერთვება ქსენოფობიურ კამპანიაში, ეს წარმოუდგენელია. პირდაპირ ჩანს, რომ ეს ადამიანი არის არა ომბუდსმენი, არამედ ანტიომბუდსმენი. დღევანდელი განცხადებით მან ეს დაადასტურა“ _ განაცხადა კობახიძემ.
ცნობისთვის, სახალხო დამცველმა ნინო ლომჯარიამ განაცხადა, რომ ბუნებრივია, თუკი საქართველოს მოქალაქეებს რუსეთის ხელისუფლებისა და მოქალაქეების მიმართ ნეგატიური დამოკიდებულება აქვთ.
,,ჩემთვის გასაკვირია, რატომ უკვირთ ამ ქვეყანაში, რომ საქართველოს მოქალაქეებს რუსეთის მოქალაქეების მიმართ ნეგატიური განწყობები ჰქონდეთ? ბუნებრივია, რომ შეიძლება სიყვარული არ გამოხატონ - არ გვაქვს მტკიცებულება, რომ ქსენოფობიას აქვს ადგილი“ _ თქვა ლომჯარიამ.
