პარლამენტის საშემოდგომო სესიის პლენარულ სხდომაზე „ქართული ოცნების“ დეპუტატმა, ირაკლი ქადაგიშვილმა, განაცხადა, რომ რევოლუციას უბედურების მეტი არასდროს არაფერი არ მოუტანია და ყველას მოუწოდა, რომ ბოიკოტისა და შიმშილობის ნაცვლად იმუშაონ პარლამენტში და მიიღონ რეალური გადაწყვეტილებები.
„მისასალმებელია, რომ იუსტიციის სამინისტროსა და მთავრობის გადაწყვეტილებით საზოგადოებას ექნება სრულყოფილი ინფორმაცია სამედიცინო დაწესებულებაში მიხეილ სააკაშვილის ყოფნას დაკავშირებით და ყველა პროცედურასთან დაკავშირებით, რაც მისი ჯანმრთელობის შენარჩუნებასთან არის დაკავშირებული. სამედიცინო მდგენელი, რომ პატიმარი გადაყვანილი იყოს სამოქალაქო კლინიკაში თავიდან ბოლომდე მოხსნილი და გამოცლილია, ეს სამკურნალო დაწესებულება ყველა სამედიცინო აღჭურვილობით არის აღჭურვილი, რაც შესაძლო გართულებების თავიდან აცილებას ემსახურება. კარგი იქნება, თუ ოპოზიცია თავისი პოლიტიკური დღის წესრიგისთვის უფრო რეალისტურ მიზეზებს დაასახელებს და არა იმ სპეკულანტურ მიზანს, რაც სინამდვილეში სააკაშვილის ჯანმრთელობის ზრუნვასთან არანაირ კავშირში არ არის. მათ რომ აინტერესებდეთ ადამიანის ჯანმრთელობა, ერთი მოწოდება მაინც იქნებოდა, რომ შეეწყვიტა ეს ე.წ. შიმშილობის აქცია, რასაც ასევე დაჟინებით ითხოვს სტრასბურგის სასამართლო“ - აღნიშნა ირაკლი ქადაგიშვილმა.
მთავარი ფოტო: 1tv.ge
