პარტია „ლელო საქართველოსთვის“ და „დროას" ლიდერებმა კოალიციური თანამშრომლობის დოკუმენტს ხელი მოაწერეს. როგორც ,,ლელოს“ ლიდერმა მამუკა ხაზარაძემ განაცხადა, მათი გაერთიანების მიზანია შექმნან ერთიანი ფრონტი, რათა ქვეყანა ერთპარტიული მმართველობიდან გამოიყვანონ.

,,ქვეყანაში შექმნილი მძიმე მდგომარეობიდან გამომდინარე, რომელიც გამოწვეულია 30 -წლიანი ერთპარტიული მმართველობიდან, ქვეყანაში დემოკრატიული ინსტიტუტების არ არსებობიდან, გაჩერებული ეკონომიკიდან, უმუშევრობისა და უამრავი სხვა პრობლემის გადასაჭრელად საჭიროა გარღვევა და ყველა ძალის კონსოლიდაცია, რომელიც ფიქრობს პროდასავლურად, ქართულად და სახელმწიფოებრივად. ჩვენ ,,დროა" და ,,ლელო" შევიკრიბეთ, რათა შევქმნათ ერთიანი ფრონტი, ერთიანი პლატფორმა იმისათვის, რომ ყველა პროდასავლური ძალა, ჯანსაღად მოაზროვნე ადამიანი, რომელსაც უნდა ქვეყნის ამ მდგომარეობიდან გამოყვანა, შემოგვიერთდეს და ერთხელ და სამუდამოდ შევქმნათ პროდასავლური, კოალიციური მმართველობა. მნიშვნელოვანია, რომ მომავალში ამ ქვეყანაში ერთ პიროვნებას და პარტიას არ ჰქონდეს ფუფუნება გადაწყვიტოს როგორ იცხოვროს საქართველომ. ეს არის სწორედ იმ კონსულტაციების შედეგი, რომელიც ელენე ხოშტარიასთან და მის თანაგუნდელებთან გავმართეთ და ჩვენი მიზნები და ამოცანები ერთმანეთს ემთხვევა. ჩვენ ვიქნებით პლატფორმა, რომელიც ერთპარტიულობის დასრულების და ჯანსაღი კოალიციის გარანტი იქნება. გარანტი, რომელიც არავის არ მისცემს ერთპარტიული მმართველობის საშუალებას. მიხარია, რომ ამ დოკუმენტს ვაწერთ ხელს, რომელიც იქნება გარდამტეხი“ _ აღნიშნა მამიკა ხაზარაძემ.