პარტია „საქართველოსთვის“ ერთ-ერთი ლიდერი ნათია მეზვრიშვილი ირაკლი ღარიბაშვილის მიერ გიორგი გახარიას მისამართით დღეს გაკეთებულ განცხადებებს გამოეხმაურა. მეზვრიშვილი ხელისუფლებას ურჩევს, არასერიოზული ბრალდებებისა და განცხადებების ნაცვლად, საქმით დაკავდეს.

„ზოგადად, ეს ისტერია ხელისუფლებას მას შემდეგ დაეწყო, რაც გიორგი გახარიამ განაცხადა, რომ აქტიურ პოლიტიკურ საქმიანობას აპირებდა. განსაკუთრებით, ეს ისტერია კიდევ უფრო მეტად გამძაფრდა, რაც გიორგი გახარიამ თბილისის მერობაზე საკუთარი კანდიდატურა წამოაყენა. ამიტომ, ეს რაღაც ისტერიული განცხადებები, რაც ჩვენ ხელისუფლების წარმომადგენლებისგან გვესმის, სერიოზული არ არის და ვფიქრობ, სერიოზულ კომენტარს არ საჭიროებს. ხელისუფლებას ვურჩევდი, ამ არასერიოზული ბრალდებების და განცხადებების ნაცვლად, საქმით დაკავდეს, რადგან როცა გიორგი გახარია ხელისუფლებაში იყო, საქმით იყო დაკავებული. მართავდა, ქვეყანას მმართველი ჰყავდა და იგრძნობოდა, რომ სახელმწიფო სახელმწიფო იყო. დღეს, სამწუხაროდ, ეს არ იგრძნობოდა.

მოვუწოდებდი პრემიერს, ნაცვლად არაადეკვატური განცხადებების გაკეთებისა, საქმით დაკავდეს, ქვეყანაში უამრავი პრობლემაა, კოვიდი მძვინვარებს, რომელსაც სამწუხაროდ, ხელისუფლება თავს ვერ ართმევს და ამ საქმეს მიხედონ, რადგან უმნიშვნელოვანესი არჩევნები გვაქვს ქვეყნის დემოკრატიული განვითარებისთვის ჩასატარებელი და უზრუნველყონ უსაფრთხო გარემოში არჩევნების ჩატარება“ - განაცხადა ნათია მეზვრიშვილმა.

მთავარი ფოტო: mkhare.ge