,,გირჩის“ წევრი ვახტანგ მეგრელიშვილი მიხეილ სააკაშვილის გვერდზე გამოქვეყნებულ პოსტს ეხმაურება და ამბობს, რომ მის გვერდზე გამოქვეყნებული სტატუსი არ უნდა წაეშალა. მისი შეფასებით, რაც აღნიშნულ სტატუსში ეწერა, იგივე ბრალდებები ,,ნაციონალური მოძრაობის“ მიმართ ისედაც ყოველთვის ისმის.
,,მე ასეთი შთაბეჭდილება დამრჩა, რომ რაც იმ სტატუსში ეწერა, „ნაციონალური მოძრაობა“ ამას ისედაც აკეთებს. რომ შეხედოთ მედიას ან განცხადებებს პოლიტიკური პარტიების და პოლიტიკოსების, რაც, მაგალითად, ამ სტატუსში ეწერა იგივე ბრალდებები ისმის მედიაში. განსხვავება რაში მდგომარეობს, მე იმასაც ვერ ვხვდები. საერთოდ არ უნდა წაეშალა მიხეილ სააკაშვილს ეს სტატუსი, ჩვეულებრივი ამბავია. ამას ისედაც პოლიტიკურ დებატებში პოლიტიკოსები ლაპარაკობენ“ _ თქვა ვახტანგ მეგრელიშვილმა.
გუშინ მიხეილ სააკაშვილის პირად გვერდზე დაიდო სტატუსი: „როგორმე უნდა მოხერხდეს, რომ ეს ტრაგედია, რაც საქართველოში ხდება, ივანიშვილს და „ქოცებს“ დამსახურებულად შეეტენოთ“. მოგვიანებით ეს სტატუსი მისი გვერდიდან წაიშალა, თავად სააკაშვილმა კი განაცხადა, რომ ის მას არ დაუწერია.
