„ქართულ ოცნებაში“ ადასტურებენ, რომ ევროპული საბჭოს პრეზიდენტის, შარლ მიშელის, პირადი წარმომადგენელი, კრისტიან დანიელსონი, უახლოეს დღეებში საქართველოში ისევ დაბრუნდება. უმრავლესობის წევრები პრობლემურ საკითხებთან დაკავშირებით ამნისტიის გამოცხადების შესაძლებლობას არ გამორიცხავენ.

„ამნისტია არ არის ტაბუდადებული და წითელ ხაზზე გავლებული თემა. მასზე საუბარი შეიძლება, უბრალოდ, დაინიშნოს რიგგარეშე არჩევნები მხოლოდ იმიტომ, რომ ოპოზიციის ნაწილის მოლოდინები არ გამართლდა და მთელმა პლანეტა-დედამიწამ უთხრა ოპოზიციას, შედით პარლამენტში, უბრალოდ არ შეიძლება. ალოგიკურია და შეუძლებელია, შენს ამომრჩეველს ეს აუხსნა“ - განაცხადა დავით სერგეენკომ.

„შეიძლება, ეს არსებული დოკუმენტი, რაც ჩვენ ვიცით, როგორც ევროკავშირის დოკუმენტი, გარკვეულად დაიხვეწოს, ან უფრო კონკრეტული გახდეს. ამ თემებთან დაკავშირებით ჩვენ უკვე განვაცხადეთ, რომ გვაქვს ჩვენი რაციონალური მოსაზრებები, კომპრომისის შესაძლებლობაც“ - აღნიშნა უმრავლესობის დეპუტატმა გია ვოლსკიმ.

დოკუმენტზე ხელმოწერის მზაობას გამოთქვამს პარლამენტის თავმჯდომარე არჩილ თალაკვაძეც, რომელმაც ოპოზიციას მოუწოდა, გადახედოს საკუთარ დამოკიდებულებას.

„დანიელსონის მოდერაციით გამართულ დიალოგზე ჩვენ მკაფიოდ ვთვქით, რომ მმართველი გუნდი პრინციპულად მზად არის შეთანხმების დოკუმენტს ხელი მოაწეროს და დიალოგი პოზიტიურად დავასრულოთ. ამასთან დაკავშირებით ჩვენი მზადყოფნა არსებობს! იმედი მაქვს, ოპოზიცია საკუთარ პასუხებსა და დამოკიდებულებას კიდევ ერთხელ გადახედავს და გარკვეულ ნაწილში გადააფასებს“ - აცხადებს არჩილ თალაკვაძე.

მთავარი ფოტო: www.consilium.europa.eu