ირანმა რუსეთს 10 დღის წინ უპილოტო საფრენი აპარატები გაუგზავნა. ამის შესახებ გამოცემა washingtonpost წერს. როგორც აშშ-ში აცხადებენ, მათგან ზოგიერთი უკვე გაუმართავი იყო. ოფიციალური პირების განცხადებით, დრონების გადაცემა ფარულად მოხდა, რაც მათი თქმით, მოსკოვსა და თეირანს შორის კავშირის გაღრმავებას ადასტურებს.
არსებული ინფორმაციით, დრონები ირანიდან 19 აგვისტოს გაიტანეს. რუსეთმა ირანისგან რამდენიმე ტიპის უპილოტო საფრენი აპარატები შეიძინა, მათ შორის Mohajer-6 და შაჰედის სერიის დრონები - Shahed-129 და Shahed-191. ყველა მათგანს შეუძლია საბრძოლო მასალის გადატანა რადარებზე, არტილერიაზე და სხვა სამხედრო ობიექტებზე თავდასხმისთვის. ოფიციალური პირების თქმით, რუსების მიერ ადრე სატესტოდ გამოყენებულ ირანულ თვითმფრინავებს მრავალჯერ განუცდია მარცხი.
