უკრაინის სახელმწიფო კომპანია ენერგოატომის ხელმძღვანელი პეტრო კოტინი აცხედებს, რომ უკრაინამ ზამთრის სეზონამდე უნდა აღადგინოს კონტროლი ზაპოროჟიეს ატომურ ელექტროსადგურზე, ხოლო რუსეთმა იქიდან უნდა გაიყვანოს თავისი სამხედროები და აღჭურვილობა. მისი თქმით, სამშვიდობოებს შეუძლიათ დაწესებულების დაცვა.

როგორც კოტინმა reuters-თან ინტერვიუში განაცხადა, გასულ კვირას განხორციელებულმა დაბომბვამ დააზიანა სამი ხაზი, რომლებიც ზაპოროჟიეს ქარხანას უკრაინულ ქსელთან აკავშირებს და რომ რუსეთს ობიექტის თავის ქსელთან მიერთება სურდა. 

„მათი გეგმაა ზაპოროჟიეს ატომური ელექტროსადგურის ყველა ხაზის დაზიანება. ამის შემდეგ ის აღარ იქნება დაკავშირებული უკრაინის ენერგოსისტემასთან“ _ განაცხადა მან.

კოტინმა ერთი დღით ადრე თქვა, რომ რუსეთის მიერ ოკუპირებულ სამხრეთ ზაპოროჟიეში ატომური ელექტროსადგურის დაბომბვა ,,ძალიან მაღალ“ რისკებს შეიცავდა.

”ეს არის ყველაზე რადიოაქტიური მასალა ელექტროსადგურში. ჩვენ მივიღებთ რადიაციულ ღრუბელს და შემდეგ ამინდი გადაწყვეტს, რომელი მიმართულებით წავიდეს ეს ღრუბელი, რისკი ძალიან მაღალია“ _ თქვა მან.

ბოლო დღეებში რუსეთის მიერ კონტროლირებად ტერიტორიაზე მდებარე ევროპაში ყველაზე დიდ ატომურ ელექტროსადგურზე განხორციელებულმა დაბომბვამ ბირთვული უსაფრთხოების საყრდენების დაზიანება გამოიწვია. აფეთქებები განხორციელდა საწვავის საწყობების მახლობლად, სადაც რადიოაქტიური მასალების 174 კონტეინერია განთავსებული. ენერგოატომის დირექტორი ტერიტორიაზე განხორციელებულ აფეთქებებს მაღალი რისკის შემცველს უწოდებს.

მისი თქმით, ატომურ სადგურს ექვსი რეაქტორი აქვს, რომელსაც სასწრაფოდ შეკეთება სჭირდება, ამიტომ ზამთრის სეზონამდე რუსებმა უნდა დატოვონ ტერიტორია, ქარხანა დაბრუნდეს უკრაინის კონტროლის ქვეშ და მოხდეს ინფრასტრუქტურის განახლება. როგორც კოტინი აღნიშნავს, ზაპოროჟიეს ელექტროსადგურზე ეს უსაფრთხოების პრობლემას მთლიანად გადაწყვეტს.

ამჟამად 500-მდე რუსი სამხედრო ობიექტზე მძიმე ტექნიკით იმყოფება და ქარხანა გამოიყენება როგორც ბაზა.