გახდეს მასწავლებლების ყოველთვიური ანაზღაურება 4 000 ლარიდან. ამ შინაარსით სოციალურ ქსელში პეტიცია ვრცელდება. პედაგოგები პრემიერ-მინისტრ ირაკლი ღარიბაშვილს მიმართავენ, შეიცვალოს მასწავლებლებისადმი დამამცირებელი და დამაკნინებელი დამოკიდებულება და მათი სასიცოცხლოდ მნიშვნელოვანი შრომა შესაბამისად დაფასდეს.

,,მივმართავთ საქართველოს პრემიერ-მინისტსა და საქართველოს პარლამენტს, დაუყოვნებლივ დაიწყოს მასწავლებლის სახელფასო პოლიტიკის გადახედვა და მასწავლებელთა თავდაუზოგავი, მძიმე, საპასუხისმგებლო და ქვეყნის განვითარებისთვის სასიცოცხლოდ მნიშვნელოვანი საქმის დაფასების პროცესი!!!

დღეს საქართველოში მასწავლებელი პანსიონერის შემდეგ ყველაზე ნაკლებ ანაზღაურებადი სოციალური ფენაა. მისი ანაზღაურება გაწეულ შრომასთან უკიდურესად არაპროპორციულია. სახელმწიფოს მასწავლებლის მიმართ არაფრადჩამგდები სახელფასო პოლიტიკა აქვს. მასწავლებელი არის ყველა განვითარებულ ქვეყანაში სასიცოცხლო მნიშვნელობის მქონე პატივცემული და დაფასებული პროფესია და საქმიანობა. ტრანსატლანტური სივრცის ყველა ქვეყანაში მასწავლებელი წარმოადგენს ძლიერ საშუალო ფენას, ზოგ ქვეყანაში კი საერთოდაც ყველაზე მაღალანაზღაურებადი საზოგადოების ნაწილია.

მოვითხოვთ, საქართველოში შეიცვალოს მასწავლებლისადმი დამამცირებელი და დამაკნინებელი დამოკიდებულება. მოვითხოვთ, დააყენოს პრემიერ-მინისტრმა და პარლამენტმა მასწავლებლის თავდაუზოგავი და სახელმწიფოს განვითარებისთვის სასიცოცხლოდ საპასუხისმგებლო და მნიშვნელოვანი შრომის დაფასების საკითხი!!! გროშებზე კი არ ამუშაოს ისინი, არამედ ადამიანისთვის და მისი ღვაწლისთვის ღირსეულ ხელფასზე - გახდეს მასწავლებლების ყოველთვიური ანაზღაურება 4 000 ლარიდან!!! თუ კი მოსამართლეების ხელფასებია თვეში 10 000 ლარიდან, მასწავლებლის სამუშაო კიდევ უფრო საპასუხისმგებლო და ინტენსიურია. ბატონო პრემიერ-მინისტრო, ბატონო პარლამენტარებო, დროა მასწავლებელი დაფასდეს!!! სამყაროს განვითარება წინ მიჰყავს მეცნიერებასა და განათლებას, და არა მოსამართლეებსა და ჩინოვნიკებს!!! ასევე მივმართავთ პედაგოგთა პროფკავშირებს, დადგეს მასწავლებელთა გვერდით მასწავლებლის ანაზღაურების საკითხის ნომერ პირველ გადასაჭრელ პრობლემად წარმოჩენის პროცესში. თუ გინდათ, რომ ქართული განათლების სისტემა და მასთან ერთად ამ ქვეყნის განვითარების მომავალს ეშველოს, დაგვაფასეთ!!“ _ ნათქვამია პეტიცისაში.