ფინანსთა მინისტრმა ლაშა ხუციშვილმა 2023 წლისთვის განათლების დაფინანსების მიმართულებით ცვლილებებზე ისაუბრა. როგორც ლაშა ხუციშვილმა პარლამენტში პლენარულ სხდომაზე განაცხადა, განათლებისა და მეცნიერების დაფინანსება 2023 წლიდან 370 მილიონი ლარით გაიზრდება და 2 მილიარდ 550 მილიონი ლარი გახდება.

მისივე თქმით, მომავალი წლიდან მასწავლებელთა დეკრეტული შვებულების 6 თვის ხელფასის დაფინანსება განხორციელდება.

,,2023 წლიდან განათლებისა და მეცნიერების დაფინანსება 370 მილიონი ლარით გაიზრდება და 2 მილიარდ 550 მილიონი ლარი გახდება. ზოგადი განათლების დაფინანსების მიმართულებით, რომელიც შეადგენს 1 მილიარდ 655 მილიონ ლარს, რომლის ფარგლებშიც სტატუსის მქონე მასწავლებელთა, ასევე, სპეცმასწავლებელთა დანამატების ზრდა იქნება 125 ლარით, სკოლის ადმინისტრაციული ტექნიკური პერსონალის ხელფასები გაიზრდება 10%-ით, სკოლის მანდატურის ხელფასი გაიზრდება 125 ლარით, ხოლო ფსიქოლოგებისა და სპეცმუშაკების ხელფასები 10%-ით გაიზრდება. სკოლის მასწავლებელთა დეკრეტული შვებულების 6 თვის ხელფასის დაფინანსება განხორციელდება.

ასევე მნიშვნელოვანია, რომ იწყება 500 სკოლის მშენებლობა/რეაბილიტაციის პროექტი, რისთვისაც 2023 წელს გათვალისწინებულია დამატებით 300 მილიონი ლარი. პროფესიული განათლების დაფინანსების მიმართულებით დაგეგმილია დაახლოებით 20%-იანი ზრდა, საათობრივ განაკვეთში 15 ლარიდან 18 ლარამდე, ხოლო ამ მიმართულებით ინფრასტრუქტურის განვითარებაზე მიემართება 55 მილიონ ლარზე მეტი. უმაღლესი განათლებისა და მეცნიერების დაფინანსებაზე მიემართება 250 მილიონ ლარზე მეტი“ _ განაცხადა ლაშა ხუციშვილმა.