ეს საკითხი გავიარეთ, ვიმსჯელეთ, საპარლამენტო უმრავლესობა მზად არის როცა საჭირო იქნება უმრავლესობის შემადგენლობიდან რამდენიმე ადამიანი წავიდეს უკრაინაში. ამის შესახებ „ქართული ოცნების“ თავმჯდომარე მამუკა მდინარაძემ განაცხადა.
,,ჩვენ არ გვაქვს უკრაინაში ჩასვლის პრობლემა. ეს საკითხი გავიარეთ, ვიმსჯელეთ, საპარლამენტო უმრავლესობა მზად არის როცა საჭირო იქნება უმრავლესობის შემადგენლობიდან რამდენიმე ადამიანი წავიდეს უკრაინაში.
რაც შეეხება პარლამენტის თავმჯდომარის ვიზიტს, მოგეხსენებათ, რომ დამატებითი პოლიტიკური დატვირთვის მატარებელია და მან რამდენიმე დღის წინ გამოაქვეყნა წერილი, რომელშიც მოტანილ არც ერთ საკითხთან, დაკავშირებით ჯერჯერობით პასუხი არ მიგვიღია. თუ მივიღებთ რეალურ პასუხს, შეურაცხყოფაზე პასუხს მივიღებთ, ელემენტარულად ამ შეურაცხყოფის უკან წაღებულ ერთ სიტყვას მაინც მივიღებთ, საქართველოს პარლამენტის თავმჯდომარე მზად არის, რომ ამ დელეგაციას უხელმძღვანელოს“_ განაცხადა მამუკა მდინარაძემ.
ცნობისთვის, საქართველოს პარლამენტის თავმჯდომარე შალვა პაპუაშვილმა უკრაინის უმაღლესი რადის თავმჯდომარისგან, რუსლან სტეფანჩუკისგან ბუჩაში მოწვევა მიიღო. ამის პასუხად პაპუაშვილმა განცხადება გაავრცელა, სადაც აღნიშნა, რომ უკრაინის მთავრობა ქართველი ხალხის და მისი ხელისუფლების ერთმანეთისგან გამიჯვნას ცდილობს, და ასევე სხვადასხვა სახის, მათ შორის კონტრაბანდის, უსაფუძვლო ბრალდებებს უყენებს. ამიტომ, როგორც პაპუაშვილმა განაცხადა, რიგი საკითხების განუმარტებლობის ფონზე, ბუჩაში მიწვევას არასათანადოდ მიიჩნევს.
მოგვიანებით კი საქართველოს პარლამენტის თავმჯდომარის კაბინეტმა განცხადება გაავრცელა, სადაც ნათქვამია, რომ ჯანმრთელობის მდგომარეობის გამო, პაპუაშვილი გადასულია მუშაობის დისტანციურ რეჟიმზე და ბუჩაში ვერ გაემგზავრება.
ამის პარალელურად ბუჩაში გამგზავრების სურვილი საპარლამენტო ოპოზიციამ გამოთქვა. პარლამენტის ვიცე-სპიკერმა, ლევან იოსელიანმა განაცხადება გაავრცელა და თქვა, რომ მისი კოორდინირებით მოხდა ოპოზიციურ პერტიებს შორის შეთანხმება და ისინი უახლოეს მომავალში ბუჩაში გაემგზავრებიან.
