ირაკლი ღარიბაშვილს ტელეფონითაც კი არ უსაუბრია ომის განმავლობაში უკრაინის არც ერთ თანამდებობის პირთან, ამაზე სამარცხვინო რა უნდა მოხდეს. ამის შესახებ ,,ნაციონალური მოძრაობის“ დეპუტატმა რომან გოცირიძემ განაცხადა.
როგორც მან აღნიშნა, საქართველოს პარლამენტის თავმჯდომარეს უკრაინაში წასვლა მოუწევს, მაგრამ ეს იქნება სამარცხვინო წასვლა.
,,ირაკლი ღარიბაშვილს ტელეფონითაც კი არ უსაუბრია ომის განმავლობაში უკრაინის არც ერთ თანამდებობის პირთან, ამაზე სამარცხვინო რა უნდა მოხდეს, ტელეფონითაც რომ არ ელაპარაკები გმირ ზელენსკის ან შენს კოლეგას უკრაინაში. საქართველოს პარლამენტის თავმჯდომარეს მოუწევს უკრაინაში ჩასვლა, მაგრამ ეს იქნება სამარცხვინო, ეს იქნება ყურში რომ ხელს მოგკიდებენ და გაჩვენებენ რა ხდება უკრაინაში და რამდენად არაადეკვატური იყო საქართველოს ხელისუფლების რეაგირება რუსეთის აგრესიის მიმართ“ _ განაცხადა რომან გოცირიძემ.
საქართველოში უკრაინის ელჩის მოვალეობის შემსრულებელმა ანდრეი კასიანოვმა განაცხადა, რომ საქართველოს პარლამენტის თავმჯდომარეს შალვა პაპუაშვილს მისი უკრაინელი კოლეგისგან ბუჩაში ჩასვლის მოწვევა გაეგზავნა. ,,დღეს მსოფლიომ ნახა და დაგმო სამხედრო დანაშაულები ბუჩაში. თქვენ გეცოდინებათ, რომ უკრაინის უმაღლესი რადას თავმჯდომარემ, ბატონმა სტეფანჩუკმა, მიმართა ყველა პარლამენტარს ჩამოვიდნენ ბუჩაში და საკუთარი თვალით ნახონ ეს დანაშაულები. შესაბამისი მოწვევა მიიღო ასევე საქართველოს პარლამენტის თავმჯდომარემ, ბატონმა შალვა პაპუაშვილმა" _ განაცხადა კასიანოვმა.
