,,ნაცმოძრაობას“ ომში ჩვენი ჩათრევა სურს და ალბათ, ყველა მიხვდა, რომ ზელენსკის მთავრობაც ღიად ცდილობს ომში ჩაგვითრიოს. ამის შესახებ ,,პატრიოტთა ალიანსის“ ლიდერმა ირმა ინაშვილმა განაცხადა.
პრორუსული პარტიის ლიდერის განცხადებით, ახლა დროა საქართველო რუსეთს მშვიდობაზე დაელაპარაკოს, რათა მერე გვიან არ იყოს.
,,ზელენსკის ხელისუფლების მხრიდან იმგვარი განცხადებები კეთდება, რომ ჩვენ ყოველდღიურად ვხედავთ მცდელობას, რომ საქართველო როგორმე ჩაებას რუსეთთან კონფლიქტში. რა კონტრაბანდული იარაღი?! ხომ ყველას ესმის, რომ საქართველოდან არაფერი მსგავსი არ ხდება! უკრაინის მთავრობა ცდილობს საქართველოს ომში ჩათრევას. მეორე ფრონტი საქართველოზე არ უნდა გაიხსნას. ამას წინ უნდა აღვუდგეთ. მე ვიზიარებ უნგრეთის ხელისუფლების პოზიციას, რომ უნგრეთი იცავს მისი ხალხის ინტერესს და რომ უკრაინის ომი მათი ომი არაა.
ახლა რომ ზელენსკი ნეიტრალიტეტზე ლაპარაკობს, ორი თვის წინ რომ იგივე ეთქვა, უკრაინა ომს აცდებოდა. ამდენი მსხვერპლი, ნგრევა, ამხელა უბედურება არ იქნებოდა და ჩვენ ასეთ ტრაგედიას უნდა ავაცილოთ ჩვენი ქვეყანა.
რუსეთთან ლაპარაკი არ შეიძლება, მითუმეტეს ახლა, როცა უკრაინა ომშიაო- ეს ნაცმოძრაობის ბოროტი პროპაგანდაა. ნაცმოძრაობას ომში ჩვენი ჩათრევა სურს და ალბათ, ყველა მიხვდა, რომ ზელენსკის მთავრობაც ღიად ცდილობს ომში ჩაგვითრიოს. ეს არ უნდა დავუშვათ! რუსეთს უნდა ვესაუბროთ ნეიტრალიტეტზე, მშვიდობაზე და მტრობა და ომი რომ არ გვინდა, ამაზეც. ახლა უნდა ველაპარაკოთ, რომ მერე გვიან არ იყოს! ნუ ავყვებით ნაცმოძრაობას და მის პარტნიორ ზელენკის მთავრობას, რომელიც თავად რუსეთთან ლაპარაკობს, ჩვენ კი, ომში გვითრევს“ _ განაცხადა ირმა ინაშვილმა.
ცნობისთვის, ,,საქართველოს პატრიოტთა ალიანსმა“ გუშინ მოსკოვში შეხვედრა გამართა. შეხვედრაზე მათ რუსეთ-საქართველოს ურთიერთობების განვითარების საკითხები განიხილეს და რუსეთის მხარეს დაუდასტურეს, რომ პარტია საერთაშორისო ასპარეზზე ქვეყნის ნეიტრალიტეტის ერთგულია.
