„პატრიოტთა ალიანსის“ ლიდერმა, ირმა ინაშვილმა რუსეთის პრეზიდენტს წერილობით მიმართა. ამასთან დაკავშირებით იგი მედიასთან დამატებით განმარტებას აკეთებს.
მისი თქმით, სახელმწიფოებრივი ინტერესებიდან გამომდინარე იგი რუსეთში ჩასვლასა და სხვადასხვა პოლიტიკური თანამდებობის პირებთან შეხვედრას აპირებს. ინაშვილი მიიჩნევს, რომ საქართველოსა და რუსეთს შორის ნდობა უნდა აღდგეს.
,,გარწმუნებთ, ასეთი ტრაგიკული რამ თუ მოხდა ამ ქვეყანაში, ჩვენი ქვეყნის დასაცავად კიდევ ჩვენ გავალთ, ჩვენი პარტიის წევრები და ნახავთ, რამდენი გაიქცევა ამ ქვეყნიდან წითელ ხიდზე, არ იქნება ტევა. ამიტომ უნდა ვიაზროვნოთ სახელმწიფოებრივად.
შენი ქვეყნის ინტერესის დაცვა ნიშნავს იმას, რასაც ვაკეთებთ და თუ დამისვამთ კითხვას, ჩახვალ თუ არა მოსკოვში და მიიღებ თუ არა მოსკოვში მონაწილეობას სხვადასხვა ფორმატებში? დიახ, ჩავალ, შევხვდები დეპუტატებს და არა მარტო დეპუტატებს, თუ იქნება ასეთი მზაობა მეორე მხრიდან. მე ასევე შევხვდები სხვადასხვა პოლიტიკური თანამდებობის პირებს იმისთვის, რომ ჩემი ქვეყნის ინტერესი დავიცვა. ჩვენ მივდივართ იმ გზით, რომელიც ჩვენს ქვეყანას სიკეთეს მოუტანს.
ჩვენი ქმედებები უნდა იყოს აბსოლუტურად გააზრებული, მშვიდი, გონივრული, კონსტრუქციული და ჩვენი ქვეყნისთვის სასარგებლო, ეს ურთიერთობა თუ არ დაეფუძნება ურთიერთგაგებას, პატივისცემას. უნდა აღდგეს ნდობა ჩვენსა და რუსეთს შორის, ისე ვერ მოვიხვეჭთ მშვიდობას ჩვენი ქვეყნისთვის. ეს არის ჩვენი პოზიცია, ამაზე ვსაუბრობთ მთელი ოთხი წლის განმავლობაში და ამისთვის ბრძოლას გავაგრძელებთ“ _ განაცხადა ირმა ინაშვილმა.
