გვინდა გავაგონოთ ევროკავშირს, რომ ქართველი ხალხი არის მომხრე საქართველომ მიიღოს კანდიდატის სტატუსი. ამის შესახებ პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძემ განაცხადა.
,,ევროკავშირში გაწევრიანების განაცხადზე საკმაოდ დაგეგმილი პოლიტიკა გვქონდა. ეს პოლიტიკა იყო ის, რომ 2024 წლისთვის ასოცირების ხელშეკრულებით ნაკისრი ვალდებულებების დაახლოებით 2/3 უნდა შეგვესრულებინა და ამის შემდეგ გაგვეკეთებინა განაცხადი. ახლა ამ რუსული აგრესიის ფონზე ვიღებთ ევროპიდან რაღაც სიგნალებს, რომელიც შეიძლება გამოყენებული იქნას ამ სტატუსის მიღების დასაჩქარებლად. ჩვენ გვინდა გავაგონოთ ხალხის ხმა ევროკავშირს, რომ ქართველი ხალხი არის მომხრე საქართველომ მიიღოს კანდიდატის სტატუსი“ _ აცხადებს ნიკოლოზ სამხარაძე.
მისი თქმით, ევროპასთან ყოფნა ქართველი ხალხის მრავალსაუკუნოვანი არჩევანია და ეს არ არის რომელიმე ეპოქის ან პოლიტიკური გუნდის განწყობა.
