სოციალურ ქსელში სასულიერო პირებს შორის ძალადობის ამსახველი ვიდეო გავრცელდა. ამასთან დაკავშირებით საქართველოს საპატრიარქო განცხადებას ავრცელებს და აღნიშნავს, რომ დაპირისპირების ამსახველ ვიდეომასალაში ფიგურანტი არცერთი პირი ბერად აღკვეცილი არ არის და ისინი მორჩილები არიან.
როგორც განცხადებაშია ნათქვამი, ეკლესიის სახელით ჩადენილი მსგავსი ქმედებები მიუღებელი, არაქრისტიანული და ამორალურია.
„სოციალურ ქსელში გავრცელდა ძალადობის ამსახველი ვიდეომასალა, რომელშიც ჩანს, თუ როგორ აყენებს ფიზიკურ და სიტყვიერ შეურაცხყოფას ერთი სამონაზვნო პირი მეორეს.
უპირველესად, აღვნიშნავთ, რომ ეს ფაქტი ყოველგვარ ზნეობრივ თუ ეთიკურ საზღვრებს სცილდება და მიუღებელია როგორც ქრისტიანული, ისე მორალური და ადამიანური თვალსაზრისით, მითუმეტეს, რომ ვიდეომასალაში ადამიანები საბერო შესამოსლით არიან წარმოდგენილნი.
აღნიშნული ვიდეოს გავრცელებისთანავე საქართველოს საპატრიარქომ დაიწყო ფაქტის გადამოწმება და შესაბამისი რეაგირება. ამ ეტაპზე არსებული ინფორმაციით, ვიდეომასალაში ასახული არცერთი პირი არ არის ბერად აღკვეცილი და ისინი მორჩილები არიან.
დეტალების დაზუსტების მიზნით ამჟამად მიმდინარეობს აქტიური კომუნიკაცია შესაბამის ეპარქიასთან, რის შემდეგაც საზოგადოებას ზუსტ და ამომწურავ ინფორმაციას მივაწვდით ამ უზნეო და ყოვლადმიუღებელი ფაქტის შესახებ.
ამასთან, კიდევ ერთხელ გარკვევით და ერთმნიშვნელოვნად აღვნიშნავთ, რომ ეკლესიის სახელით ჩადენილი ასეთი ქმედებები აბსოლუტურად მიუღებელი, არაქრისტიანული და ამორალურია, უზნეობის გამოსწორების ნაცვლად ის აზარალებს და ბღალავს ეკლესიის სახელსა და სიწმინდეს“_ ნათქვამია საპატრიარქოს განცხადებაში.
ცნობისთვის, სოციალურ ქსელში გავრცელდა ვიდეო, სადაც მღვდელი ანაფორაში ჩაცმულ მეორე სასულიერო პირზე ფიზიკურად ძალადობს. ვიდეოში ნახსენებია ფერისცვალების ეკლესიის წინამძღვარი, დეკანოზი შალვა კეკელია.
