თბილისის საკრებულოს არჩევნებზე, პარტია ,,ალეკო ელისაშვილი - მოქალაქეების" ვაკის მაჟორიტარობის კანდიდატი თინათინ გუგუნავა იქნება.
თინათინ გუგუნავა პროფესიით იურისტია. 2003 წელს წარჩინებით დაამთავრა ივანე ჯავახიშვილის სახელობის სახელმწიფო უნივერსიტეტი და ამავე  წლიდან არის ადვოკატთა ასოციაციის წევრი.  2017 წელს მან ასევე მოიპოვა LL.M-ის ხარისხი ილინოისის ტექნოლოგიური უნივერსიტეტის ჩიკაგო-კენტის სამართლის სკოლიდან საერთაშორისო და ტრანსნაციონალურ ბიზნეს სამართალში. თინათინ გუგუნავა არის საქართველოს ადვოკატთა ასოციაციის სამეწარმეო და კონკურენციის სამართლის კომიტეტის წევრი, ადვოკატებისათვის ატარებს ტრეინიგებს ბიზნესს სამართლის სხვადასხვა აქტუალურ საკითხებზე. ის არის CEDR-ის მიერ სერტიფიცირებული მედიატორი და ასევე  გაეროს შრომის საერთასორისო ორგანიზაციის (ILO) მიერ სერტიფიცირებული კოლექტიურ შრომითი დავების მედიატორი. თინათინი სამედიატორო საქმიანობას ეწეოდა ასევე ჩიკაგოში სწავლის პერიოდშიც ქ. ჩიკაგოს საქალაქო სასამართლოში, რისთვისაც მოპოვებული აქვს აშშ-ში სამედიატორო საქმიანობის განხორციელების ლიცენზია.

ალეკო ელისაშვილი - პარტია ,,მოქალაქეების" თავმჯდომარე: თამამად შემიძლია ვთქვა, რომ თინათინი ერთერთი იმათგანია, ვინც ძირფესვიანად იცის თბილისი და მისი პრობლემები. მოხარული ვარ, რომ ის დღეს ვაკის მაჟორიტარობის კანდიდატია ჩვენი პარტიიდან. დარწმუნებული ვარ, საკრებულოში ის ქალაქის ხელმძღვანელობას მუდმივად შეაჯანჯღარებს ვაკისა და მთლიანად თბილისის მოსახლეობის პრობლემების მოგვარებისთვის.

ლევან იოსელიანი - პარლამენტის ვიცე - სპიკერი, პარტია ,,მოქალაქეების" ერთ-ერთი ლიდერი: თინათინს მე დიდი ხანია ვიცნობ, როგორც შესანიშნავ იურისტს და პროფესიონალ ადვოკატს. მჯერა, მისი პროფესიონალიზმი და საქმისადმი ერთგულება ნამდვილად გამოადგება საკრებულოსა და ზოგადად თბილისს.

თინათინ გუგუნავა: ჩვენ ვიქნებით ქალაქის წარმომადგენლობით ორგანოს, რეალურად წარმომადგენლობითი წევრები და არა ქალაქის ხელისუფლების გაგრძელება ან რომელიმე მერის გუნდი. ეს გარემოება და ასეთი დამოუკიდებლობა საშუალებას მოგვცემს აქტიური ზედამხედველობა გაუწიოთ თბილისის მერიის მუშაობას, რაც საკრებულოს უმთავრესი ფუნქციაა.