,,საერთაშორისო გამჭვირვალობა - საქართველოს“ მიერ გამოქვეყნებული სტატისტიკა, თუ რომელმა დეპუტატმა რამდენი წერილობითი კითხვა გადააგზავნა სხვადასხვა უწყებაში, ნათლად წარმოაჩენს მათი საქმიანობის ხარისხს პარლამენტში. კვლევაში 2020 წლის 12 დეკემბრიდან 2022 წლის 17 ივნისის ჩათვლით პერიოდში განხორციელებული საპარლამენტო კონტროლი და მისი შედეგებია შეფასებული.

როგორც ,,საერთაშორისო გამჭვირვალობა - საქართველოს“ მიერ გამოქვეყნებულ შედეგებშია ასახული, ყველაზე მეტი სადეპუტატო კითხვის ავტორი მმართველი გუნდიდან მიხიელ სარჯველაძე, ხოლო ოპოზიციიდან ლევან იოსელიანი და ალექსანდრე ელისაშვილი არიან.

სადეპუტატო კითხვების რაოდენობის მიხედვით ყველაზე აქტიურ დეპუტატთა ათეული ასე გამოიყურება: მიხეილ სარჯველაძე - 445 კითხვა; ლევან იოსელიანი - 313 კითხვა; ალექსანდრე ელისაშვილი - 284 კითხვა; ხატია დეკანოიძე 236 კითხვა; თეონა აქუბარდია - 181 კითხვა; ხათუნა სამნიძე - 177 კითხვა; თამარ კორძაია - 155 კითხვა; რომან გოცირიძე - 135 კითხვა; ეკა სეფაშვილი - 134 კითხვა; გიორგი ბოტკოველი - 126 კითხვა.

აღსანიშნავია ასევე, რომ პარლამენტის 59-მა წევრმა ანგარიშვალდებულ ორგანოებს სულ 2922 შეკითხვა გაუგზავნა, რომელთაგან 371 უპასუხოდ დარჩა. გაგზავნილებიდან 2098 ოპოზიციური დეპუტატის კითხვა იყო, ხოლო 823 - ,,ქართული ოცნების“ წევრის. პასუხგაუცემელი კითხვებიდან 91 კითხვა ფრაქცია „ქართული ოცნების“ წევრი დეპუტატის დასმული იყო, ხოლო 280 - ოპოზიციის წარმომადგენლის. ყველაზე მეტჯერ დეპუტატებმა კითხვით მიმართეს იუსტიციის მინისტრს. 6 ინტერპელაციის ნაცვლად ჩატარდა ერთი ინტერპელაცია და გაიმართა 19 მინისტრის საათი. კომიტეტის სხდომაზე ანგარიშვალდებული თანამდებობის პირი 19-ჯერ დაიბარეს, აქედან, 12 შემთხვევაში, როდესაც დაბარების ინიციატორი ოპოზიცია იყო, ანგარიშვალდებული პირები სხდომაზე არ გამოცხადდნენ.

პარლამენტის წევრის კითხვა საპარლამენტო კონტროლის მექანიზმია, რომელიც, როგორც წესი, ყველაზე ხშირად გამოიყენება. მექანიზმი გულისხმობს დეპუტატის უფლებამოსილებას კითხვით მიმართოს მთავრობას, მთავრობის წევრს, პარლამენტის წინაშე ანგარიშვალდებულ სხვა ორგანოს, ყველა დონის ტერიტორიული ერთეულის ხელისუფლების ორგანოს თუ სახელმწიფო დაწესებულებას.