საქართველოს პარლამენტის თავდაცვისა და უშიშროების კომიტეტის წევრ ალეკო ელისაშვილს და ვიცე სპიკერ ლევან იოსელიანს, პოლონეთის უმსხვილესი სამხედრო სამრეწველო კომპანიის წარმომადგენლებთან შეხვედრა ჰქონდათ.

შეხვედრა საქართველოს საპარლამენტო დელეგაციის ოფიციალური ვიზიტის ფარგლებში ქალაქ კელცაში შედგა, სადაც ყოველწლიური სამხედრო სამრეწველო გამოფენა მიმდინარეობს.

გამოფენაზე საქართველოს პარლამენტის წევრები სეიმის თავდაცვის კომიტეტის წევრების მასპინძლობით იმყოფებიან. უკრაინაში მიმდინარე ომის ფონზე, პოლონეთში იარაღის ექსპოზიცია განსაკუთრებულ მნიშვნელობას იძენს. წარმოდგენილ შეიარაღებას შორის 90% სწორედ პოლონეთშია წარმოებული.

ალეკო ელისაშვილი: „აქ წარმოდგენილი გამაოგნებელი ყველა სისტემაა, რომელიც განსაკუთრებით ჩვენს ქვეყანას სჭირდება, ტანკსაწინააღმდეგო, ჰაერსაწინააღმდეგო, ხომალდსაწინააღმდეგო... და რაც ძალიან მნიშვნელოვანია პოლონური წარმოების. უზარმაზარი სურვილი და მზაობა აქვთ, რომ საქართველოსთან გააღრმაონ ურთიერთობა. საქართველოს თავდაცვის სამინისტროს ამ კომპანიასთან უკვე დაწყებული აქვს თანამშრომლობა, მაგრამ მეტია საჭირო, ყველამ კარგად ვიცით და უკრაინის ომმა აჩვენა, როგორი სანდო პარტნიორი და ერთგული მეზობელია პოლონეთი. როგორც კი ჩამოვალ თბილისში ვიქნები ერთ-ერთი აქტიური ლობისტი იმის, რომ პოლონეთის სამხედრო სამრეწველო კომპანიასთან საქართველომ თავდაცვის და უსაფრთხოების სფეროში სამხედრო მრეწველობის განვითარების სფეროში გააღრმაოს ურთიერთობა.“

საქართველოს საპარლამენტო დელეგაციის ვიზიტი პოლონეთში, სეიმის ვიცე მარშალის მიწვევით მიმდინარეობს.