საქართველოს ახალგაზრდა იურისტთა ასოციაციის თავმჯდომარე ალექსანდრე ლაშქარავას გარდაცვალებასთან დაკავშირებით მიმდინარე გამოძიებაზე საუბრობს და ამბობს, რომ გარდაცვალების მიზეზზე საუბრის გადატანით ხელისუფლება ცდილობს დაამტკიცოს, რომ ის გარდაიცვალა არა 5 ივლისის, არამედ სხვა მიზეზის გამო და შესაბამისად, მათ ამაში პასუხისმგებლობა არ მიუძღვით. ნიკოლოზ სიმონიშვილის თქმით, ეს არ ათავისუფლებს ხელისუფლებას პასუხისმგებლობისგან და არ აქვს მნიშვნელობა ვინ ატარებს აქციას, ან რა მიზეზით ატარებს და როდესაც პრემიერი აქეზებს მოძალადეებს მან თავის თავზე პოლიტიკური პასუხისმგებლობა უნდა აიღოს.

„მნიშვნელობა არ აქვს ლექსო ლაშქარავა რა მიზეზით გარდაიცვალა, ხელისუფლებას ნებისმიერ შემთხვევაში აქვს პასუხისმგებლობა ასაღები იმაზე, რაც 5 ივლისს თბილისში მოხდა. ის, რომ ხელისუფლებამ ვერ დაიცვა კონსტიტუციური უფლებები და იყო ქაოსი მთელს ქალაქში, ეს მას პოლიტიკურ პასუხისმგებლობას აკისრებს და ეს პოლიტიკური პასუხისმგებლობა უნდა აიღოს. ლექსო ლაშქარავას გარდაცვალების მიზეზზე საუბრის გადატანით, ხელისუფლება ცდილობს დაამტკიცოს, რომ ლექსო ლაშქარავა გარდაიცვალა არა 5 ივლისის, არამედ სხვა მიზეზის გამო და შესაბამისად, მათ ამაში პასუხისმგებლობა არ მიუძღვით, თუმცა ეს არ ათავისუფლებთ იმ პასუხისმგებლობისგან, რაც 50-ზე მეტ პირზე ძალადობაში გამოიხატა და სახელმწიფომ არაფერი გააკეთა, რომ ჩვენი უსაფრთხოება ყოფილიყო დაცული.

როგორც იცით, გარდაცვლილის დედა არ დაეთანხმა ექსპერტიზაზე ცხედრის გადასვენებას, ლექსოს ცხედარი უბრალოდ გაიტაცეს და რა ხდებოდა ლექსოს ცხედართან მიმართებით რამდენიმე საათის განმავლობაში ჩვენთვის არის უცნობი. ეს არ არის სწორი და დაუშვებელი იყო ასეთი რაღაცის გაკეთება ადვოკატთან კონსულტაციის გარეშე, ჩვენ გვქონდა უფლება სრულად დავსწრებოდით იმ პროცედურას, რაც ლექსოს სხეულთან დაკავშირებით შეიძლება მომხდარიყო. ფაქტობრივად, რამდენიმე საათი რა ხდებოდა მის სხეულთან დაკავშირებით ჩვენთვის არის უცნობი“ - განაცხადა ნიკოლოზ სიმონიშვილმა.

მთავარი ფოტო: gdb.rferl.org