საბერძნეთში საქართველოს საელჩოს ინფორმაციით, საქართველოს მოქალაქემ თანამესაკნე მოკლა. უწყების ცნობით, საქართველოს ელჩს, დავით დონდუასა და ქალაქ ხანიის პენიტენციური დაწესებულების დირექტორს შორის თემაზე სატელეფონო საუბარი შედგა.

"2021 წლის 1 ივლისს საქართველოს ელჩი დავით დონდუა ტელეფონით ესაუბრა ქალაქ ხანიის სასჯელაღსრულების დაწესებულების დირექტორს ღეორღიოს კონდაქსაკისს. 

ეს ის დაწესებულებაა, სადაც 26 ივნისს, საქართველოს მოქალაქემ მოკლა მისი თანამესაკნე, ასევე საქართველოს მოქალაქე. ციხის დირექტორმა საქართველოს ელჩს განუცხადა, რომ შეძრწუნებულია მომხდარით და აღნიშნა, რომ ამჟამად ამ საქმეზე კრეტის უსაფრთხოების დეპარტამენტის მიერ მიმდინარეობს გამოძიება.

დირექტორმა ასევე აღნიშნა, რომ კონტაქტზეა ათენში საქართველოს საელჩოს საკონსულო განყოფილებასთან და მზად არის მომავალშიც გააგრძელოს საელჩოსთან თანამშრომლობა" - წერია განცხადებაში.

ფოტო: facebook