,,ქართული ოცნების“ ასეთი სამარცხვინო საგარეო პოლიტიკის წყალობით, ერთადერთი ქვეყანა, რომელსაც ეს ქალი ასე თითის ქნევით ლაპარაკს უბედავს, ვართ ჩვენ. ამის შესახებ მოქალაქეების ლიდერმა, ალეკო ელისაშვილმა განაცხადა. ამით იგი გამოეხმაურა რუსეთის საგარეო საქმეთა სამინისტროს წარმომადგენლის, მარია ზახაროვას განცხადებას აფხაზეთსა და სამხრეთ ოსეთზე, რომ რუსეთი საქართველოსგან ითხოვს სავალდებულო შეთანხმებას ორი ქვეყნის წინააღმდეგ ძალის გამოუყენებლობის შესახებ.
,,ზახაროვა, ვინც თვალყურს ადევნებს ამ ქალბატონის საქმიანობას, ყველამ იცის, რომ ,,ლოთბაზარა“ ქალია. ჩვენდა სამარცხვინოდ, ჩვენი ხელისუფლების დამსახურებით ისე დაბეჩავდა საერთაშორისო არენაზე საქართველო, რომ ერთადერთი ქვეყანა, რომელსაც ეს ქალი ასე თითის ქნევით ლაპარაკს უბედავს, ვართ ჩვენ. რატომ უნდა გვიბედავდეს რომელიმე უცხოელი მსგავსი რამის თქმას, რომ თითქოს დამოუკიდებელი ქვეყნებია ეს რაღაცა არარსებული სეპარატისტული წარმონაქმნები, ანდა თურმე ჩვენ რაღაცა უსაფრთხოების გარანტიები უნდა გვქონდეს... ასეა ყველგან, ადამიანურ ურთიერთობებშიც, სახელმწიფოების ურთიერთობებშიც, თუ აბედინებ გიბედავენ, და ჩვენ ვაბედინებთ, ჩვენი ,,ქართული ოცნების“ ასეთი ბეჩავი, სამარცხვინო საგარეო პოლიტიკის წყალობით გვიბედავს ყველა, ვისაც არ ეზარება და ამ შემთხვევაში ეს ქალი, რომელიც შეიძლება ფხიზელიც კი არ იყო იმ დროს, როცა ასეთ განცხადებას აკეთებდა. ასეთი ქვეყანაა რუსეთი, რაც უფრო დაუწვები, უფრო გადაგივლის. ერთადერთი, რასაც აღიარებს რუსეთი, ეს არის ძალა, და ჩვენ ძალას კი არ ვასხივებთ, ჩვენ ვასხივებთ სიბეჩავეს რუსეთთან მიმართებაში, განსაკუთრებით ბოლო ერთი წლის განმავლობაში. ცოტა უფრო ღირსეულად და მტკიცედ რომ დავმდგარიყავით თავიდანვე, ამდენს ვეღარ გაგვიბედავდნენ, მით უმეტეს ის ზახაროვა“ _ აცხადებს ელისაშვილი.
