შავი ,,ვოლგების“ ფსიქოლოგია ოდესღაც უნდა დავასრულოთ და დეპუტატებმა უარი უნდა ვთქვათ სახელმწიფო მანქანებზე. ამის შესახებ ,,მოქალაქეების“ ლიდერმა, ალეკო ელისაშვილმა განაცხადა. მისივე თქმით, პარლამენტის წევრებისთვის საწვავსა და სატელეფონო ხარჯებზე გამოყოფილი თანხა ბიუჯეტის უაზრო ფლანგვაა.

როგორც ელისაშვილი აცხადებს, უკეთესი იქნება, თუ დაზოგილ თანხებს უფრო მნიშვნელოვანი საქმისკენ მივმართავთ.

,,ორ წელიწადზე მეტია რაც პარლამენტში ვართ და ამ ხნის მანძილზე არც მე და არც ლევან იოსელიანს, მიუხედავად იმისა, რომ გვეკუთვნოდა, ერთი ლიტრი ბენზინის ტალონიც კი არ გამოგვიყენებია პარლამენტიდან და ერთი თეთრიც კი არ ჩაგვირიცხავს ტელეფონზე. ლევანს, როგორც ვიცე-სპიკერს სამსახურეობრივი მანქანაც და პირადი დაცვაც კი ეკუთვნოდა. ამაზე, რა თქმა უნდა, საერთოდ არც ვსაუბრობთ. ლევანისთვის გამზადებული იყო კონკრეტული მანქანა, რომელიც მას უნდა მომსახურებოდა, თუმცა ჩვენ ის მანქანა თვალით არ გვინახავს, რადგან არ გვინდოდა. მიმაჩნია, რომ მხოლოდ რამდენიმე ადამიანი შეიძლება სარგებლობდეს სამსახურეობრივი მანქანის მომსახურებით საქართველოში. პარლამენტის წევრების უმეტესობა სამსახურთან ახლოს ცხოვრობს და ვფიქრობ, უბრალოდ უხერხულია. უნდა შევქმნათ ახალი კულტურა, რომ ასე არასაჭიროდ არ ვიყენებდეთ სახელმწიფო რესურსებს, სახელმწიფო მანქანის გამოყენებაც ხომ არასაჭირო რესურსი და ბიუჯეტის უაზრო ფლანგვაა. ჩვენი ხელფასი გვაძლევს იმის საშუალებას, რომ თავად ჩავრიცხოთ ტელეფონზე. ეს რაღაც შავი ,,ვოლგების“ ფსიქოლოგია ოდესღაც უნდა დავასრულოთ და დეპუტატებმა უარი უნდა ვთქვათ სახელმწიფო მანქანებზე. ჩვენნაირ ღარიბ ქვეყანაში ახალი კულტურა უნდა იყოს ეს. ჩვენ ამას ყოველგვარი აფიშირების გარეშე ვაკეთებდით, რადგან მიმაჩნია, რომ მართალი უნდა იყო პირველ რიგში საკუთარ სინდისთან და შემდეგ ამომრჩეველთან, რომელმაც ხმა მოგვცა.

ქვეყანაში უამრავი პრობლემაა. ,,ქართული ოცნება“ თავიდან ხშირად საუბრობდა ,,ქამრების შემოჭერაზე“, თუმცა ბოლო დროს აღარც კი ახსენებენ ამ ფრაზას. არაფერში სჭირდებათ დეპუტატებს ის მანქანები, რომელიც მათ ემსახურება და რომელსაც ხშირად ოჯახური საჭიროებებისთვისაც კი იყენებენ. ვფიქრობ, უფრო სწორი იქნება, თუ დარჩება რამდენიმე მანქანა საერთო სარგებლობისთვის,  მეც მისარგებლია გასვლით სხდომაზე, ან სამხედრო ბაზების მოსანახულებლად რომ წავსულვართ რეგიონებში, ამის მეტი მართლა არაა საჭირო. თუ ნამდვილად გვინდა, შეგვიძლია, რომ ,,ქამრების შემოჭერით“ დაზოგილი თანხები სხვა უფრო მნიშვნელოვანი საქმისკენ მივმართოთ, რითიც ქვეყანაში რამდენიმე ადამიანის პრობლემას მაინც მოვაგვარებდით“ _ აცხადებს ალეკო ელისაშვილი.

ცნობისთვის, ,,ინტერპრესნიუსმა“ პარლამენტიდან გამოითხოვა საჯარო ინფორმაცია, რომლის პასუხადაც აცნობეს, რომ საპარლამენტო თანამდებობაზე მყოფი პარლამენტის წევრებისათვის ჯამში გამოყოფილია 51 ერთეული ავტომანქანა. საქართველოს მე-10 მოწვევის პარლამენტის წევრებისთვის განკუთვნილი ავტომანქანებისთვის ყოველთვიურად ჯამში 28350 ლიტრი საწვავი გამოიყოფა. 2020 წლის დეკემბრიდან 2023 წლის იანვრის ჩათვლით, საქართველოს პარლამენტის ბიუჯეტიდან სრული ავტოპარკის საწვავის შესაძენად გამოყოფილ იქნა 1 904 963.96 ლარი.

მათივე ინფორმაციით, საქართველოს მე-10 მოწვევის პარლამენტის წევრების სატელეფონო ხარჯებისთვის ორ წელიწადში 42 698,87 ლარი, კერძოდ, 2021 წელს - 20 723.34, 2022 წელს კი 21 975.53 ლარი დაიხარჯა. პარლამენტის აპარატის თანამშრომლებისთვის სატელეფონო მომსახურებაზე 2021 წელს 58 142,75 ლარი, 2022 წელს კი 63 480.52 ლარი დაიხარჯა.