დღეს პარლამენტმა პლენარულ სხდომაზე, მინისტრის საათის ფორმატში ფინანსთა მინისტრს ლაშა ხუციშვილს მოუსმინა.

მინისტრის საათს პარლამენტის ვიცე-სპიკერი ლევან იოსელიანი უძღვებოდა.

მინისტრმა გამოსვლაში ყურადღება ძირითადად ორ საკითხზე გაამახვილა. ესენია: ძირითადი ეკონომიკური და ფისკალური პარამეტრები და სამინისტროში მიმდინარე რეფორმები.

როგორც მან აღნიშნა, 2021 წელს, რეალურმა ეკონომიკურმა ზრდამ 10,6%-ს მიაღწია, რაც 2,5-ჯერ მეტია თავდაპირველად პროგნოზირებულ მაჩვენებელზე. 2019 წელთან შედარებით კი, ეკონომიკური ზრდის მაჩვენებელი 3.1%-ით გაუმჯობესდა

მან, ასევე, ისაუბრა ტურიზმის სექტორზე და აღნიშნა, რომ პანდემიის პირველი დარტყმა ეკონომიკაში ტურიზმის სექტორმა მიიღო, თუმცა 2021 წლის მეორე ნახევრიდან, ტურიზმიდან მიღებული შემოსავლები უკვე აჭარბებს 2019 წლის დონის 50 პროცენტს, ხოლო 2022 წლის იანვარში, უკვე 69.3 პროცენტი შეადგინა.

საგარეო ვაჭრობასთან დაკავშირებით კი ლაშა ხუციშვილმა აღნიშნა, რომ 2021 წელს ექსპორტი 26.9 პროცენტით, მათ შორის, ადგილობრივი ექსპორტი - 29.9 პროცენტით გაიზარდა.

ანგარიშის წარდგენის შემდეგ, სხდომა კითხვა-პასუხის ფორმატში გაგრძელდა. ოპოზიციის მწვავე კითხვები გაზრდილ საგარეო ვალს, მომატებულ გადასახადებსა და ლარის კურსის ცვალებადობას ეხებოდა.