ხერსონის ოლქში 90-ზე მეტი დასახლება დეოკუპირებულია, სადაც 12 ათასზე მეტი ადამიანი ცხოვრობს. ამის შესახებ ინფორმაციას მედია უკრაინის თავდაცვის სამინისტროზე დაყრდნობით ავრცელებს. მათივე ცნობით, დეოკუპირებულ დასახლებებში სტაბილიზაციის ღონისძიებები მიმდინარეობს.
დღეს უკრაინის თავდაცვის სამინისტროს დაზვერვის მთავარი სამმართველოს უფროსმა, კირილ ბუდანოვმა განაცხადა, რომ რუსებს ხერსონის ოლქში ახალი სამხედრო შენაერთები შემოჰყავთ და წასასვლელად კი არა, თავდაცვისთვის ემზადებიან. ბუდანოვის თქმით, სერგეი სუროვიკინი, რომელიც უკრაინის წინააღმდეგ ომში რუსეთის ჯარების სამხრეთ ჯგუფს მეთაურობს, ილუზიას ქმნის, თითქოს რუსული ჯარები ხერსონის დატოვებას აპირებენ. მისი თქმით, ამ ეტაპზე, ამის თქმა შეუძლებელია.
