ახლა თუ რამე ახარებს რუსეთს, ეს საქართველოსა და უკრაინას შორის ცუდი ურთიერთობაა. იმის მაგივრად, რომ მხარდამხარ ვიდგეთ და ერთად ვიბრძოდეთ ყველა მიმართულებითა და ყველა შესაძლებლობით, ერთმანეთის ლანძღვით ვართ დაკავებული. ამ სიტყვებით ,,მოქალაქეების“ ლიდერი ალეკო ელისაშვილი მიხაილო პოდოლიაკის განცხადებას გამოეხმაურა. მისი თქმით, საქართველოს ხელისუფლებასა და უკრაინის ხელკისუფლებას შორის დაპირისპირება ძალიან დამაზიანებელია.
,,ძალიან არ მომწონს ეს პინგ-პონგი, რაც არის საქართველოს ხელისუფლებასა და უკრაინის ხელკისუფლებას შორის, ძალიან დამაზიანებელია. ზოგჯერ მიჩნდება განცდა, რომ იქნებ ახლა ერთმანეთისკენ ნაბიჯები გადავდგათ, მაგრამ მერე ისევ ერთმანეთის საწინააღმდეგო განცხადებებს აკეთებენ. პოდოლიაკის ბოლო განცხადებაში რაც არ მომეწონა არის ის, რომ ბიძინა ივანიშვილის რუსეთთან თანამშრომლობის მტკიცებულებები აქვთ. გვაჩვენონ ეს მტკიცებულებები. ისევე როგორც მახსოვს, რომ თითქოს უკრაინის სამხედრო დაზვერვის მონაცემებით აქედან შედიოდა არასანქცირებული პროდუქტი. ასე მტკიცებულებების გარეშე საუბარი არ შეიძლება. ახლა თუ რამე ახარებს რუსეთს, ეს საქართველოსა და უკრაინას შორის ცუდი ურთიერთობაა. იმის მაგივრად, რომ მხარდამხარ ვიდგეთ და ერთად ვიბრძოდეთ ყველა მიმართულებითა და ყველა შესაძლებლობით, ერთმანეთის ლანძღვით ვართ დაკავებული, რაც ძალიან დამაზიანებელია“ _ განაცხადა ალეკო ელისაშვილმა.
უკრაინის პრეზიდენტის მრჩეველმა, მიხაილო პოდოლიაკმა ტელეკომპანია ,,ფორმულას“ ეთერში განაცხადა, რომ ბიძინა ივანიშვილი იმ ადამიანების სიაში შედის, რომლის სანქცირებასაც უკრაინა გამოაცხადებს. მისი თქმით, უკრაინის მხარეს აქვს გარკვეული მტკიცებულებები, რომ ივანიშვილი რუსეთთან თანამშრომლობს.
