ვლადიმერ ზელენსკისა და ნატო-ს გენერალურ მდივანს შორის სატელეფონო საუბარი შედგა.
უკრაინის პრეზიდენტის ადმინისტრაციის ინფორმაციით, საუბრისას ლიდერები უსაფრთხოების კუთხით უკრაინა-რუსეთს შორის გამწვავებულ ურთიერთობებს განიხილავდნენ.
„ჩვენ მოწოდებული ვართ ჩვენი არმიისა და თავდაცვის სექტორის რეფორმირებისთვის, მაგრამ რუსეთს მხოლოდ რეფორმები არ შეაჩერებს. ნატო დონბასში ომის დასრულების ერთადერთი გზაა. უკრაინისთვის MAP-ის მინიჭება რუსეთისთვის ნამდვილი სიგნალი იქნება" - აღნიშნა ზელენსკიმ.
უკრაინის პრეზიდენტმა იენს სტოლტენბერგს უკრაინის საზღვრებთან რუსეთის ჯარის მობილიზების შესახებაც მიაწოდა ინფორმაცია.
პრეზიდენტის ადმინისტრაციის მიერ გავრცელებული ინფორმაციით, ზელენსკიმ მადლობა გადაუხადა ნატოს გენერალურ მდივანს ალიანსის მიერ უკრაინის უსაფრთხოებასთან დაკავშირებული სიტუაციის მიმართ ყურადღების გამოჩენისთვის და ნატოს წევრებს მოუწოდა, მეტი ყურადღება მიაქციონ შავი ზღვის რეგიონის უსაფრთხოების საკითხს და რეგიონში სამხედრო ყოფნა გააძლიერონ.
”ასეთი მუდმივი ყოფნა უნდა იყოს ძლიერი შემაკავებელი ფაქტორი რუსეთისთვის, რომელიც განაგრძობს რეგიონის მასშტაბურ მილიტარიზაციას და ხელს უშლის სავაჭრო გადაზიდვებს” - განაცხადა ვლადიმერ ზელენსკიმ.
მთავარი ფოტო: europetime.eu
