საქართველოს პარლამენტმა ამნისტიის შესახებ კანონპროექტს მესამე მოსმენით 87 ხმით, 1-ის წინააღმდეგ მხარი დაუჭირა.
ახალი კანონის თანახმად, სასჯელი შეუმცირდებათ და პენიტენციურ დაწესებულებაში ყოფნის პერიოდი სასჯელის მოხდის ვადაში განსხვავებული წესით ჩაეთვლებათ პატიმრებს, რომელთაც პანდემიის გამო კომუნიკაციაზე დაწესებული შეზღუდვების პირობებში მოუწიათ სასჯელის მოხდა.
ამნისტია იმ პირთა მიმართაც გავრცელდება, რომლებმაც დანაშაულის მომზადება ან მცდელობა ჩაიდინეს.
ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის, მიხეილ სარჯველაძის განმარტებით, კომიტეტის სხდომაზე მესამე მოსმენით საკითხის განხილვის შემდეგ, კანონში რედაქციული ხასიათის შენიშვნები გათვალისწინებულია და საბოლოო პროექტში ასახულია.
კანონის პროექტი გამოქვეყნებიდან მესამე სამუშაო დღეს ამოქმედდება.
