ღირსებაშემლახველი განცხადებების გამო, პრემიერ-მინისტრმა თანამდებობა უნდა დატოვოს. ამის შესახებ ,,საერთაშორისო გამჭვირვალობა - საქართველოს“ თავმჯდომარე ეკა გიგაურმა განაცხადა. მისი თქმით, არსებულ ვითარებაში ღარიბაშვილი შესაბამისი ფიგურა არ არის თანამდებობაზე.
,,მისი განცხადებები საქართველოს ინტერესების საწინააღმდეგო იყო. მისი ღირსებაშემლახველი განცხადებების გამო, მან თანამდებობა უნდა დატოვოს. როდესაც ასეთ კრიზისულ სიტუაციაში ვართ, არ მგონია ის იყოს შესაბამისი ფიგურა, რომელმაც შეიძლება ერთი მხრივ საქართველოს ინტერესები გაატაროს ამ კრიზისულ ვითარებაში, მეორე მხრივ კი ვხედავთ, როგორ სწრაფად ვითარდება უკრაინის ევროკავშირის კანდიდატობის საკითხი. ეს მნიშვნელოვანი პროცესია, რომელშიც საქართველო არ ჩანს. ჩვენ გვქონდა ომი რუსეთთან და მგონია, ჩვენი ქვეყანა იმსახურებს, ამ მიმართულებით წინ წავიდეთ. არ ვიცით, რას აკეთებს ამ დროს ხელისუფლება. ამის სათავეში უნდა იყოს პრემიერ-მინისტრი. მთავრობა დაკავებული უნდა იყოს იმით ამ პროცესში საქართველომ რა შეიძლება მიიღოს. არ მგონია, რომ პრემიერი ადეკვატურად აფასებს ამ ყველაფერს და იცის, რა უნდა გააკეთოს როგორც მთავრობის ხელმძღვანელმა. ის არ არის სწორი ფიგურა ამ თანამდებობაზე“ _ აცხადებს ეკა გიგაური.
