ინგლისის ერთ-ერთ კუნძულზე, პილ აილენდზე მონარქის ვაკანსია გამოცხადდა. მომავალ მონარქს უცნაური რამ მოეთხოვება - მას  ბარისა და სასტუმროს მართვა, ასევე მე-13 საუკუნის სასახლის მოვლა დაევალება. კანდიდატს უნდა ჰქონდეს ბარის მართვის გამოცდილება, უყვარდეს განმარტოება და უნდა გამოთქვას მზადყოფნა მეფედ კურთხევის ცერემონიისთვის, რაც შემდეგში მდგომარეობს: მომავალი მონარქი ხის სამეფო ტახტზე ჯდება და მას თავზე დიდი რაოდენობით ლუდს ასხამენ.

ჯონ მერფი, რომელიც კუნძულს 40 წლის მანძილზე მართავდა, ამბობს, რომ ვინც ამ სამსახურს მიიღებს, მას თავი სრულად უნდა მიუძღვნას.

,,შენ გჭირდება თავგანწირვა, განმარტოებისა და სიმშვიდის დიდი სიყვარული. ეს სამსახური განსაკუთრებულ თვისებებს მოითხოვს“ _ ამბობს მერფი. მისი თქმით, სიამოვნებით იმუშავებდა თავად, მაგრამ 73 წლის ასაკში ამისთვის უკვე ძალიან მოხუცია.

ქალაქ ბეროუ-ინ-ფერნესის საქალაქო საბჭო მომავალ მონარქს 10 წლიან ხელშეკრულებას გაუფორმებს. აპრილამდე კუნძულს მეფე ან დედოფალი უკვე უნდა ჰყავდეს, რადგან ტურისტული სეზონი აქ აპრილიდან სექტემბრამდე გრძელდება და ქალაქიდან საბორნე მიმოსვლაც ამ პერიოდშია ხელმისაწვდომი.