პარტია „საქართველოსთვის“ წევრი, გიორგი ხოჯევანიშვილი, ჟურნალისტებთან დეპოლარიზაციის დასრულების საკითხს ეხმაურება. ხოჯევანიშვილი მიიჩნევს, რომ როცა საუბარია საერთო ეროვნულ შეთანხმებაზე, ეს არ შეიძლება იყოს რომელიმე კონკრეტულ ინდივიდზე მორგებული შეთანხმება.

„ჩვენთვის მისასალმებელია ის ინიციატივა, რომლითაც სალომე ზურაბიშვილი გამოვიდა. უნდა ითქვას, რომ ეს არის საკმაოდ რთული მისია, ჩვენ ამ ყველაფერს საკმაოდ ფრთხილი ოპტიმიზმით ვუყურებთ. იმედი გვაქვს, რომ მოლაპარაკებები დადებითი შედეგით დასრულდება და ჩვენ გვინდა ამ ყველაფერში ჩვენმა პოლიტიკურმა გუნდმა პოზიტიური როლი შეასრულოს. როცა ჩვენ ვსაუბრობთ საერთო ეროვნულ შეთანხმებაზე, ეს არ შეიძლება იყოს რომელიმე კონკრეტულ ინდივიდზე მორგებული შეთანხმება. ამის უკან ვგულისხმობთ ზეპარტიულ საკითხებს, ისეთებს, როგორიც არის პოლარიზაციის დასრულება, დეოკუპაცია, მართლმსაჯულების ძირეული რეფორმა, საარჩევნო რეფორმა და ა.შ. ინდივიდუალურ საკითხებთან დაკავშირებით არ არის ეს ინიციატივა,"- განაცხადა ხოჯევანიშვილმა.

მთავარი ფოტო: 1tv.ge