კიმ ჩენ ინის მამის, კიმ ჩენ ირის გარდაცვალებიდან 10 წლისთავთან დაკავშირებით ჩრდილოეთ კორეაში 11 დღიანი გლოვა გამოცხადდა. გლოვის ფარგლებში ჩრდილოეთ კორეელებს სიცილი, დალევა და საყიდლებზე სიარული ეკრძალებათ. მოქალაქეები ყოფილი ლიდერის გარდაცვალების 10 წლისთავთან დაკავშირებით მის ქანდაკებასთან მიდიან, რათა მას პატივი მიაგონ. Radio Free Asia-ს ცნობით, 11 დღის განმავლობაში ყოველგვარი გასართობი ღონისძიებები იკრძალება. ვინც ამ წესს დაარღვევს, დააპატიმრებენ, ასე ხდება ყოველ წელს ამ პერიოდში.

,,თუ გლოვის პერიოდში თქვენი ოჯახის წევრი გარდაიცვლება, თქვენ უფლება არ გაქვთ ხმამაღლა იტიროთ, მიცვალებული კი გლოვის პერიოდის გასვლის შემდეგ უნდა დაკრძალოთ. ადამიანებს საკუთარი დაბადების დღის აღნიშვნაც კი არ შეუძლიათ, თუ ის გლოვის პერიოდს დაემთხვევა“ _ იუწყება Radio Free Asia ჩრდილოეთ კორეის მოქალაქეზე დაყრდნობით.

მისი მამის გარდაცვალებიდან ყოველ წელს კიმ ჩენ ინი მას პატივს მიაგებს. გლოვის დღეები აქამდე 10 დღე გრძელდებოდა, წელს კი ის 11 დღემდე გაზარდეს.

კიმ ჩენ ირი ჩრდილოეთ კორეას 1994-2011 წლებში მართავდა. იგი 69 წლის ასაკში გულის შეტევით გარდაიცვალა.