„გირჩი“ კანაფისა და მარიხუანას უკანონო შეძენა-შენახვა, გადაზიდვა, გადაგზავნა, გასაღებაზე სისხლის სამართლის პასუხისმგებლობის გაუქმებას და კოდექსიდან შესაბამისი მუხლის ამოღებას ითხოვს.

პარტიამ პარლამენტს საკანონმდებლო ინიციატივა წარუდგინა, რომლის გათვალისწინებით, მცენარე კანაფისა და მისი პროდუქტების ბრუნვა სისხლის სამართლის პასუხისმგებლობას არ გამოიწვევს. შესაბამისად, "გირჩის" კანონპროექტის მიხედვით, ასეთი ქმედების დეკრიმინალიზაცია ხდება.

„კანაფის მოხმარება 2018 წლიდან ლეგალურია. ამის მიუხედავად, ვიცით, რომ ადამიანების დევნა მაინც გრძელდება. იუსტიციის სამინისტროსგან გამოვითხოვეთ ინფორმაცია იმის თაობაზე, თუ რამდენი ადამიანი იხდის სასჯელს მარიხუანასა და მისი პროდუქტების ფლობასთან ან მოხმარებასთან დაკავშირებით. მივიღეთ პასუხი, რომ 311 ადამიანი არის პრობაციონერი, ხოლო 84 ადამიანი სასჯელს იხდის კანაფისა და მისი პროდუქტების ფლობაზე, ქონაზე ან მოხმარებაზე. ეს მონაცემებია პროდუქტზე, რომელიც საკონსტიტუციო სასამართლოს მიერ ლეგალიზებულია. კანონპროექტით, სისხლის სამართლის სფეროდან საერთოდ ამოდის მცენარე მარიხუანასთან და კანაფთან დაკავშირებული ურთიერთობები. ეს ადმინისტრაციულ სამართალდარღვევის საკითხი იქნება. კანონპროექტით, ეს ქმედება ისევ რჩება სამართლით დაცულ სფეროში, მაგრამ პროექტის მიღების შემთხვევაში, კანაფის გამო არც ახლა იჯდება ვინმე ციხეში და არც შემდეგ. გვინდა, პირველი ნაბიჯი გადავდგათ და შევუთანხმდეთ ერთმანეთს იმაში, რომ კანაფისა და მისი პროდუქტების გამო ერთმანეთს არ ვიჭერთ. ის, თუ როგორ უნდა დარეგულირდეს ადმინისტრაციულ სფეროში, ამაზე ერთად მსჯელობა შეგვიძლია, მმართველ პარტიასა და ოპოზიციას.

საკონსტიტუციო სასამართლოს მიერ 2018 წელს მიღებული გადაწყვეტილებით, კანაფი თავისი რეგულირებით გაუთანაბრდა ისეთ ნივთიერებებს, როგორიც არის ალკოჰოლი, რომელიც განსაკუთრებულ დამოკიდებულებას საჭიროებს. როგორც დანარჩენი პროდუქტების გამო ადამიანებს არ ვიჭერთ, ზუსტად ასე იყოს. ამ თემას დაჭერის შიში მოვაშოროთ და უკეთეს რეგულაციაზე ვიმსჯელოთ“ - განაცხადა იაგო ხვიჩიამ.

მთავარი ფოტო: rferl.org