პარლამენტმა მესამე მოსმენით მიიღო კანონპროექტი, რომელიც ნასვამი და ნარკოტიკული ზემოქმედების ქვეშ მყოფი მძღოლების წინააღმდეგ სანქციების გამკაცრებას შეეხება, პირველად არაფხიზელ მდგომარეობაში მყოფ მძღოლს ადმინისტრაციული პატიმრობა შეეფარდება. ,,ადმინიატრაციულ სამართალდარღვევათა კოდექსში" აღნიშნული ცვლილებები პარლამენტს დეპუტატებმა, პარტია ,,მოქალაქეების“ ლიდერებმა ალეკო ელისაშვილმა და ლევან იოსელიანმა შესთავაზეს, რომელსაც მმართველმა გუნდმა მხარი დაუჭირა. ეს კანონი ძალაში შევა დღეიდან ორი თვის შემდეგ.

,,შინაგან საქმეთა სამინისტრომ დააზუსტა პრომილეები, პირველ ჯერზე არანაკლებ 0,3 და არაუმეტეს 0,7-მდე მოქალაქეს 6 თვით შეუჩერდება მართვის უფლება, ხოლო 0,7 პრომილეზე მეტი - 1 წლით, ანუ 0,7-ზე მეტი ნიშნავს, რომ მაგარი მთვრალი ხარ. ადმინისტრაციული პატიმრობა და სანქციების გამკაცრება შემოდის განმეორებით შემთხვევაზე, ანუ მეორე ჯერზე თუ სიმთვრალის მაჩვენებელი იქნება 0,7-ზე მეტი, ამ შემთხვევაში შეეფარდება ადმინისტრაციული პატიმრობა. ადმინისტრაციული პატიმრობა გულისხმობს მაქსიმუმ 15 დღით პატიმრობას.  ჩვენ არც არავის დაჯარიმება გვიხარია და არც არავის დაპატიმრება, მაგრამ კარგი ის არის, რომ ამ კანონპროექტმა და სანქციების გამკაცრებამ რომ გადაარჩინოს თუნდაც ერთი სიცოცხლე, უკვე ჩავთვლით, რომ ძალიან დიდი საქმე გავაკეთეთ. ყოველდღე ერთ-ერთი მთავარი ახალი ამბავი არის ავტოავარიები, რომლის გამომწვევი ერთ-ერთი მთავარი მიზეზი არის ნასვამი მძღოლები, ოჯახები ამოწყვეტილან და ვიცით როგორი სტატისტიკა გვაქვს. ამ სტატისტიკას რომ რამე ეშველოს, უკვე ძალიან დიდი საქმე იქნება გაკეთებული. მადლობა ყველა იმ დეპუტატს, მნიშვნელობა არ აქვს, ოპოზიციიდან იქნება თუ მმართველი პარტიიდან, ვინც მხარი დაგვიჭირა, და მადლობა შსს-ს, რომელმაც დაგვიზუსტა, რომ ერთი ჭიქა და ორი ბოცა თანაბრად არ ისჯებოდეს და განსხვავებული სასჯელი იყოს ამ პრომილეების მიხედვით“ _ განაცხადა ალეკო ელისაშვილმა.

,,დღეს პარლამენტმა მესამე მოსმენით მიიღო, ჩემი და ალეკოს მიერ ინიცირებული, კანონპროექტი, რომლის მიხედვითაც ძალიან მკაცრდება მთვრალ მდგომარეობაში ავტომობილის მართვა. ხოლო, განმეორებით შემთხვევაში ასეთი უპასუხისმგებლო ქმედება, პირველად დაისჯება ადმინისტრაციული პატიმრობით 10-დან 15 დღემდე ვადით. იქნება სამართლიანი მიდგომა სიმთვრალის დონეების შესაბამისად და კიდევ უამრავი სხვა ცვლილება, რომელიც კანონპროექტმა მოაწესრიგა დაზოგავს ჩვენი მოქალაქეების სიცოცხლეს. ნუ დაგვავიწყდება, რომ ყოველწლიურად ავტოსატრანსპორტო შემთხვევებს 500-მდე ადამიანი ეწირება, 7000-მდე კი სახიჩრდება. ვულოცავ ამ კანონის მიღებას ყველა იმ ადამიანს, ვისთვისაც ადამიანის სიცოცხლე ფასეულია“ _ განაცხადა ლევან იოსელიანმა.