მმართველ გუნდში აცხადებენ, რომ საარჩევნო კოდექსში შესატან ცვლილებებზე მხარის არ დაჭერით ,,ლელო“ ,,ნაციონალური მოძრაობის რიგებს შეუერთდა.

იურიდიულ საკითხთა კომიტეტის თავმჯდომარის, ანრი ოხანაშვილის შეფასებით, "ლელოს" დეპუტატები არიან არა პარლამენტის წევრები, არამედ "ნაციონალური მოძრაობის" პარტიული წევრები, რომლებიც მათ ინტერესებს აჟღერებენ.

მე ვეღარ განვიხილავ „ლელოს“ წევრებს, როგორც ადამიანებს, რომლებიც პარლამენტში საქმიანობენ, ისინი რეალურად არიან არა პარლამენტის წევრები, არამედ „ნაციონალური მოძრაობის“ პარტიული წევრები, რომლებიც მათ ინტერესებს აჟღერებენ. „ნაციონალური მოძრაობა“ იყენებს „ლელოს“ ინსტრუმენტად, როგორც ხელმომწერ მხარეს, რომ გააჟღერებინოს მათი ინტერესები. „ლელო“ დღეს არის „ნაციონალური მოძრაობის“ პარტიული აქტივით დაკომპლექტებული წევრებით, რომლებიც არიან ინსტრუმენტი „ნაციონალური მოძრაობის“ ხელში. როგორც ჩანს, „ლელომ“ მიშელის დოკუმენტს ფორმალურად მოაწერა ხელი და ვფიქრობ, მათზე შესაბამისი რეაგირება საერთაშორისო აქტორების მხრიდან უნდა განხორციელდეს“ _ განაცხადა ანრი ოხანაშვილმა.

პარლამენტის ფრაქცია "ქართული ოცნების" თავმჯდომარის პირველი მოადგილის, გივი მიქანაძის განცხადებით კი, ,,ლელომ“ საზოგადოებას კიდევ ერთხელ დაუმტკიცა, რომ მათთვის ვიწრო პარტიული ინტერესბი არის ყველაზე მნიშვნელოვანი.

"საზოგადოებას კიდევ ერთხელ დაუმტკიცეს, რომ მათთვის ვიწრო პარტიული ინტერესბი არის ყველაზე მნიშვნელოვანი, საზოგადოების და ქვეყნის ინტერესები არაფერს წარმოადგენს. მათ მართლაც უგულებელყვეს ის შეთანხმება, რომელსაც 19 აპრილს "ლელომ" ხელი მოაწერა და ფაქტობრივად "ნაცმოძრაობის" რიგებს შეუერთდნენ. ენმ დღემდე არ აწერს ამ დოკუმენტს ხელს და საერთაშორისო ღირებულებებს არ აღიარებს,"- განაცხადა გივი მიქანაძემ.

შეგახსენებთ, 86 ხმით სამის წინააღმდეგ პარლამენტმა საარჩევნო კოდექსში ცვლილებები დაამტკიცა. პროექტი ოპოზიციის ნაწილთან შეთანხმებული იყო, თუმცა "ნაციონალურმა მოძრაობამ" და პარტია "ლელომ" თავი შეიკავეს.