არასამთავრობო ორგანიზაცია ,,საფარის“ ხელმძღვანელი, ბაია პატარაია სამეგრელოში მომხდარ შემზარავ ამბავს სოციალურ ქსელში გამოეხმაურა და თქვა, რომ სახლის დაწვა და ლინჩის წესით გასამართლება გამოსავალი არ არის, ეს უკონტროლო ბოროტებაა და არაფერი აქვს საერთო სამართლიანობასთან. ბაია პატარაიას ამ განცხადებას საზოგადოების დიდი ნაწილის უარყოფითი შეფასება მოჰყვა, მოქალაქეთა უმრავლესობის აზრით, ლინჩის წესი პედოფილიის მიმართ სწორედაც რომ სამართლიანი განაჩენი იყო. ხოლო პატარაიამ საზოგადოების ასეთ შეფასებებს მოგვიანებით ასე უპასუხა:

,,ხალხი თურმე ტანზე იხევს, ბაია პატარაიამ ლინჩის წესი როგორ დაგვიწუნაო და 4 პატარა ბავშვისთვის სახლის გადაწვა როგორ არ გვაპატიაო. ჰოდა, იცი რას გეტყვით? თქვენ არც ჩემზე მეტად შეგტკივათ გული გაუპატიურებულ და ნაცემ ბავშვებზე და ქალებზე და სავარაუდოდ არც ჩემზე მეტი გაგიკეთებიათ მათთვის.

ლინჩის წესი, უკანონობა და სისხლის აღება რომ გამოსავალი იყოს, წლობით კი არ ვირბენდი სასამართლოში ხან აქა და ხან სტრასბურგში, არამედ შემოვიკრებდი ერთ ათ კაი ჯანიან ქალს და ყველა მოძალადე კაცს დუბინკებით გადავამტვრევდით ძვლებში. თუ გგონიათ, რომ ამ ქვეყანაში 10 გამწარებული ქალი არ მოიძებნება, ძალიანაც ცდებით.

ცნობისათვის, ინდოეთში უკვე არსებობს ასეთი ვარდისფერსარიანთა Gulabi Gang, (იხილეთ ფოტო). არც ჩვენ გაგვიჭირდებოდა ვარდისფერი კაბების და დუბინკების შოვნა, მაგრამ კანონი და წესიერი ქვეყანა გვირჩევნია. კანონის უზენაესობის სწავლას და პრაქტიკას შევალიე მთელი ჩემი შეგნებული ცხოვრება და გაველურებულ ბრბოს არ დავანებებ ლინჩის წესით ვინმეს გასამართლებას, არასდროს! არანაირი მორალური უპირატესობა არ გაგაჩნიათ კანონმორჩილ მოქალაქეებთან შედარებით. მომინდომეს აქ სიველურის რომანტიზება...

და არა, ოდნავადაც არ ხართ ჩვენზე მეტად აღშფოთებულები და გაბრაზებულები!“ _ წერს სოციალურ ქსელში ბაია პატარაია.