ფილოსოფოსი ლევან ღამბაშიძე სოციალურ ქსელში წერს, რომ ივანიშვილის დეპუტატმა ნინო წილოსანმა უჩივლა და მისგან 10 000 ლარს ითხოვს.

"ბედი ხო არაფერში არ მაქვს, ხალხი რა ბრძოლას და განსაცდელს გადის და როგორი საგმირო პერიოდი უდგას საქართველოს, მე კიდე წილოსანმა მიჩივლა და ათიათას ლარს მთხოვს, და კიდე უნდა ვთქვა რომ მის ოჯახს არ მოუპარავს 65 მილიონი, რასაც ქოცების პროკურატურა ამტკიცებდა ათ წელზე მეტ ხანს.

არა და ასე ვიცოდი, რომ მისმა ოჯახმა 65 მილიონი მოიპარა რაღაც ვაგონთმშენებლისაგან" - წერს ღამბაშიძე. 

საუბარია ლევან ღამბაშიძის მიერ, 12 თებერვალს სოციალურ ქსელში გამოქვეყნებულ სტატუსზე, სადაც ღამბაშიძე წერდა, რომ წილოსანის ოჯახმა "ბიუჯეტიდან 65 მილიონი ლარი მოიპარა".

"მთავრობამ დააანონსა(რა მაგარი ენაა ქართული, თავისი სამი ა-თი), რომ დასავლურ გრანტებზე სრულიად უარის თქმის შემდეგ თავად შექმნის რაღაც ორგანიზაციას, რომელსაც ექნება 20 მილიონიანი ბიუჯეტი და რომელიც სამთავრობო გრანტებს გაანაწილებს სამთავრობო ენჯეოებზე.

ანუ, მთელს საქართველოს რა გრანტებიც შეუწყდება, მაგის დაბალანსებას ცდილობს იმაზე სამჯერ ნაკლები თანხით, რაც წილოსანის ოჯახმა მოიპარა ბიუჯეტიდან.

მგონი ხოშიანი თრეიდია არა? რას იტყვით წილოსანის ამომრჩევლებო? თქვენ არ გენდომებოდათ ეგ 65 მილიონი? და დასავლური გრანტები რო თქვენს ცხოვრებას აუმჯობესებდა, ეგ გაცვალეთ წილოსანის გაუმჯობესებულ ცხოვრებაში?". - წერდა ღამბაშიძე 12 თებერვალს. 

13 თებერვალს სოციალურ ქსელში საპასუხო სტატუსი გამოაქვეყნა ივანიშვილის დეპუტატმაც, წილოსანი წერდა, რომ ღამბაშიძე იტყუება და თუ საჯაროდ არ უარყოფდა წილოსანთან დაკავშირებულ "ცრუ ბრალდებებს", სასამართლოში შეხვდებოდა. 

2013 წელს საქართველოს რკინიგზის ყოფილი დირექტორის ირაკლი ეზუგბაიას წინააღმდეგ სისხლის სამართლებრივი დევნა დაიწყო, შპს "საქართველოს რკინიგზისთვის" 65 მილიონიანი ზიანის მიყენების ბრალდებით დააკავეს კიდევ რამდენიმე პირი, მათ შორის სატვირთო გადაზიდვების დირექტორი, აბელ გიორგობიანი, გადაზიდვების მოძრავი შემადგენლობის დეპარტამენტის უფროსის მოადგილე გიორგი ჟღენტი, შპს "ვაგონმშენებელი კომპანიის" დამფუძნებელი ბადრი წილოსანი [ნინო წილოსანის მამა], გენერაური დირექტორი ირაკლი თოდუა, დირექტორები მამუკა დოლიძე და ვლადიმერ აბულაძე. 

მაშინ დაკავებულები გირაოს სანაცვლოდ გათავისუფლდნენ, მათ შორის, იყო წილოსანის მამა ბადრი წილოსანი და ვლადიმერ აბულაძე, ნინო წილოსანის ყოფილი მეუღლე. საქალაქო სასამართლოს განაჩენის გამოსატანად 10 წელი დასჭრიდა და 2023 წელს გამამართლებელი განაჩენი გამოიტანა. 

ერთი წლის შემდეგ, 2024 წლის 4 სექტემბერს გამამართლებელი განაჩენი ძალაში დატოვა მეორე ინსტანციამაც.