შალვა პაპუაშვილმა განაცხადა, რომ ამნისტიის კანონპროექტის ოპოზიციის ვერსია შარლ მიშელის დოკუმენტის სულისკვეთებას ეწინააღმდეგება.

„ქართული ოცნების“ ერთ-ერთი ლიდერის თქმით, ამნისტია ყველას შეეხება და ეს არის 19 აპრილის შეთანხმების იდეა.

„საპარლამენტო ოპოზიციამ „ამნისტიის შესახებ” კანონპროექტს მეორე მოსმენით ხმა არ მისცა, რაც არის აშკარად 19 აპრილის შეთანხმების დარღვევა. იმედია, მესამე მოსმენისთვის მოემზადებიან და პასუხისმგებლობას გაათვიცნობიერებენ, რომ ხელშეკრულებას ხელს რომ აწერენ, ის უნდა შესრულდეს კიდეც. „ამნისტიის შესახებ“ ჩვენი პროექტი სრულ შესაბამისობაშია 19 აპრილის შეთანხმების შინაარსთან და არსთან. ოპოზიციის ვერსია პირდაპირ ეწინააღმდეგება შეთანხმებაში მოყვანილ სიტყვას - „ყველას“. მათ პროექტში წერია, რომ ამნისტირებული უნდა იყოს ნაწილი და არა - ყველა. ამნისტია ეხება ყველა დარღვევას, რომელიც დაკავშირებული იყო 20-21 ივნისის მოვლენებზე“ - განაცხადა შალვა პაპუაშვილმა.

მთავარი ფოტო: metronome.ge