პარლამენტმა „ამნისტიის შესახებ“ კანონის პროექტი, პირველი მოსმენით განიხილა და მიიღო. ინიციატივას მხარი 91 დეპუტატმა დაუჭირა.

კანონპროექტი განსახილველად პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ მიხეილ სარჯველაძემ წარმოადგინა. კანონპროექტი ითვალისწინებს გარკვეული შეღავათები დაუწესდეთ პატიმრებს, რომელთაც პანდემიის გამო კომუნიკაციაზე გაწესებული შეზღუდვების პირობებში მოუწიათ სასჯელის მოხდა.

როგორც სარჯველაძემ განმარტა, კოვიდპანდემიის დაწყების შემდეგ სასჯელაღსრულებით დაწესებულებებში გაჩნდა გარკვეული შეზღუდვების გატარების საჭიროება და პატიმრებს კომუნიკაცია მათივე უსაფრთხოებიდან გამომდინარე ნაწილობრივ შეეზღუდათ, რამაც მათ გარკვეული პრობლემები შეუქმნა სოციალიზაციის თვალსაზრისით. სარჯველაძის განცხადებით, აღნიშნულიდან გამომდინარე გარკვეული შეღავათების დაწესების საჭიროება გაჩნდა იმ პატიმრებთან მიმართაბაში, ვისაც სასჯელის მოხდა ამ შეზღუდვების პირობებში მოუწიათ. ინიციატივა ითვალისწინებს, ასეთ პატიმრებს სასჯელაღსრულებით დაწესებულებაში გატარებული ყოველი 4 დღე სასჯელის 5 დღის მოხდად ჩაეთვალოთ, რაც მათთვის მისჯილი სასჯელის გადაანგარიშებას გამოიწვევს.

,,ამნისტიამ შეიძლება შეამციროს ვადები პირობით ვადამდე განთავისუფლების ან სამაჯურის ტარების პირობასთან დაკავშირებითაც. „ასევე შესაძლებელია მსჯელობა შედარებით მეტი შეღავათის დაშვებაზე გარკვეული კატეგორიის პატიმრებთან მიმართებით, როგორიცაა ხანდაზმულები, არასრულწლოვანები, ქალები. მეორე მოსმენისთვის ამ საკითხებზეც გვექნება ჩამოყალიბებული პოზიცია“ _ განაცხადა სარჯველაძემ.